Երեկ՝ հոկտեմբերի 28-ին, «Մանչեսթեր Յունայթեդը» հայտարարեց Էրիկ Տեն Հագի հրաժարականի մասին։
🔴 Ինչպես հայտնում է Sky Sports-ը, «Մանչեսթեր Յունայթեդի» ղեկավարությունը տեն Հագին աշխատանքից հեռացնելու որոշումը կայացրել է միաձայն։ INEOS-ի ներկայացուցիչները, սըր Ջիմ Ռեթքլիֆը, Օմար Բերադան, սըր Դեյվ Բրեյլսֆորդը, Գլեյզերների ընտանիքը․․․ բոլորը համաձայնել են, որ եկել է փոփոխությունների ժամանակը:
Հիշեցնենք, որ տեն Հագը գլխավորել է «Մանչեսթեր Յունայթեդը» 2022 թվականի ապրիլին։ Ամռանը հոլանդացին երկարաձգեց պայմանագիրը «Մանչեսթեր Յունայթեդի» հետ ևս երկու մրցաշրջանի համար։ Պրեմիեր լիգայի անցած մրցաշրջանը «Մանչեսթեր Յունայթեդը» նրա գլխավորությամբ ավարտեց ութերորդ տեղում: Մասնագետի պաշտոնանկության պահին «Յունայթեդը» շատ ավելի ցածր դիրքում է՝ 14-րդ տեղն ու ինը խաղից հետո 11 միավոր։
Նրա պաշտոնանկությունից հետո Ռուդ վան Նիստելռոյը դարձել է «Մանչեսթեր Յունայթեդի» գլխավոր մարզչի ժամանակավոր պաշտոնակատարը։
Էրիկի գլխավորությամբ մանկունիանցիները նվաճել են Լիգայի գավաթը 2023 թվականին և Անգլիայի գավաթը 2024 թվականին։
Այդ մասին մասնագետը բազմիցս նշում էր մամուլի ասուլիսների ժամանակ, երբ լրագրողները խոսում էին թիմի արդյունքների մասին։ Այո, մեկ կողմից՝ Էրիկն ՄՅՈւ-ում ավելի շատ տիտղոս է նվաճել, քան, օրինակ, Արտետան «Արսենալում»։ Մյուս կողմից՝ դա ԱՊԼ-ի չեմպիոնական տիտղոսը, կամ ՉԼ-ի գավաթը չէ։ Եթե նախորդ մրցաշրջանում առաջնությունում կամ եվրագավաթներում անհաջողությունը կարելի էր կապել մեծ թվով վնասվածքների հետ, ապա այս մրցաշրջանում այդպիսի «արդարացում» դժվար էր մեջբերել։ Ակումբի համար սա վատագույն մեկնարկներից մեկն էր պատմության մեջ, եթե ոչ վատագույնը։ Նաև թիմի արդյունավետության մասին չմոռանանք ԱՊԼ-ում․ տեն Հագի օրոք մանկունիանցիները ավելի քիչ գոլ են խփել, քան, օրինակ, «Բրենտֆորդը»։
«Մանչեսթեր Յունայթեդը» Էրիկ տեն Հագի գլխավոր մարզչի պաշտոնավարման ընթացքում ավելի քան 650 միլիոն եվրո է ծախսել նոր տրանսֆերների վրա: Հոլանդացի մասնագետի գլխավորությամբ թիմը համալրել են, օրինակ, կիսապաշտպան Կազեմիրոն, վինգեր Անտոնին, դարպասապահ Անդրե Օնանան, պաշտպան Լիսանդրո Մարտինեսը, հարձակվող Ռասմուս Հոյլունդը և կիսապաշտպան Մեյսոն Մաունթը։
Առաջին մրցաշրջանը տեն Հագի գլխավորությամբ կարելի էր դրական համարել․ երրորդ տեղն ԱՊԼ-ում, գավաթային տիտղոսը, թիմը ՉԼ-ի ուղեգիր էր նվաճել, բայց հետոն․․․
Այն, ինչ տեն Հագը ստեղծել էր ու հասել «Այաքսի» հետ, եկեք օբյեկտիվորեն նայենք, չստացվեց կրկնել Մառախլապատ Ալբիոնում։ Թիմի արդյունքները, բուն խաղը, որը մեղմ ասած՝ հստակ տեղադրված չէր տակտիկական առումով, մի շարք գրանցված հակառեկորդները․․․ Գումարած այդ ամենին՝ նաև որոշ դեպքերում «բախտի» բացակայությունը։ Մեկ մրցաշրջանում կրած 14 պարտությունը «Մանչեսթեր Յունայթեդի» հակառեկորդն է Պրեմիեր լիգայի դարաշրջանում: Իսկ ջախջախիչ հաշիվներով պարտությունները՝ «Էնֆիլդում» 0-7-ը, 6 գոլը «Ման Սիթիից», չորսական՝ «Քրիսթալ Փելասից» և «Բրենտֆորդից»․․․ Եթե այդ ամենը լիներ, օրինակ, պայմանական միջակ ակումբում, միգուցե ակումբի ղեկավարությունը որոշեր ևս մի քիչ ժամանակ տալ մարզչին, միգուցե․․․ Բայց այժմ մենք խոսում ենք գրանդ ակումբի մասին, որին արդյունք է պետք այստեղ և հիմա։ Այնպես որ, հասունացել էր պահը բաժանվելու նիդեռլանդացի մասնագետից․․․
Ո՞վ կփոխարինի Տեն Հագին
Լիսաբոնի «Սպորտինգի» գլխավոր մարզիչ Ռուբեն Ամորիմը ընդունել է «Մանչեսթեր Յունայթեդը» գլխավորելու առաջարկը, հայտնում է Manchester Evening News-ը և մի շարք այլ աղբյուրներ։ Այս պահին պորտուգալացի մասնագետը ֆավորիտն է այս պաշտոնը գլխավորելու հարցում։
CaughtOffside-ն էլ իր հերթին հայտնում է, որ Ամորիմն իբր արդեն համաձայնեցրել է պայմանագիրը «Մանչեսթեր Յունայթեդի» հետ։ Ըստ աղբյուրի՝ պորտուգալացին երկու տարվա պայմանագիր կկնքի ՄՅՈւ-ի հետ։ Անգլիական ակումբում նա տարեկան կվաստակի մոտ 8 միլիոն եվրո։ Ամորիմը «Սպորտինգը» գլխավորում է 2020 թվականից։ Նրա գլխավորությամբ Լիսաբոնի թիմը երկու անգամ դարձել է Պորտուգալիայի չեմպիոն, երկու անգամ հաղթել է Պորտուգալիայի լիգայի գավաթը և մեկ անգամ՝ երկրի Սուպերգավաթը։
Ինչպես հայտնում է Sky Sports-ը, «Լեսթերի» հետ հաջորդ խաղում, որը կանցնի Լիգայի գավաթի խաղարկությունում, թիմը կգլխավորի Ռուդ վան Նիստելռոյը, սակայն կիրակի օրը «Չելսիի» հետ խաղում «Մանչեսթեր Յունայթեդի» ղեկին արդեն կարող է լինել Ամորիմը։
Իսկ ահա ինչպես հայտնում է նույն Manchester Evening News-ը, ակումբը կարող էր դիմել նաև Օլե Գունար Սուլշերին՝ գլխավոր մարզչի պաշտոնում վերադառնալու համար: Դա պայմանավորված է նրանով, որ տեն Հագին զգալի փոխհատուցում վճարելուց հետո ակումբը չի կարողանա փոխհատուցել որևէ բարձրակարգ մարզչի պայմանագիրը, ով արդեն իսկ աշխատում է մեկ այլ թիմում, և ազատ գործակալների շուկայում մարզիչների ընտրությունը ավելի սուղ է։
🔴 Ինչպես հայտնում է Goal-ի լրագրող Ռիչարդ Մարտինը, «Մանչեսթեր Յունայթեդը» պետք է հոլանդացուն վճարի 17,5 միլիոն ֆունտ ստեռլինգ՝ պայմանագրի վաղաժամկետ խզման համար: Որոշակիորեն ավելի էժան կլիներ տեն Հագին աշխատանքից հեռացնել 2025 թվականի հունիսին, մասնավորապես այդ դեպքում փոխատուցումը կկազմեր 10 միլիոն ֆունտ: Ի դեպ, 17,5 մլն ֆունտ ստերլինգ այն գումարն է, որը տնտեսվել է «Օլդ Թրաֆորդում» 250 աշխատակիցների կրճատման արդյունքում։
Ինչպես հայտնում է լրագրող Բեն Ջեյքոբսը ,մարզչի պաշտոնի թեկնածուների թվում են եղել նաև Յուլիան Նագելսմանը և Թոմաս Ֆրանկը։ Նրանցից առաջինը մարզում է Գերմանիայի հավաքականը, իսկ երկրորդը՝ «Բրենտֆորդը»։ Ակումբը կապ է հաստատել նաև այս թեկնածուների հետ: Միաժամանակ նշվում է, որ «Մանչեսթեր Յունայթեդի» ղեկավարությունում կան ներկայացուցիչներ, ովքեր հավանում են Անգլիայի հավաքականի նախկին մարզիչ Գարեթ Սաութգեյթին։ Սակայն մասնագետը վերջերս բացառել է աշխատանքի վերադառնալու հնարավորությունը մինչև հաջորդ ամառ։ Բացի այդ, INEOS-ի ներկայացուցիչները նախկինում կապի մեջ են եղել Գրեհեմ Փոթերի հետ։ Վերջերս լուրեր էին շրջանառվում, որ ակումբը փորձել է բանակցություններ վարել նաև Մասիմիլիանո Ալեգրիի, Զինեդին Զիդանի ու Չավիի հետ։
Համենայն դեպս, ակումբում մեծ փոփոխություններ են սպասվում։ Եվ դա վերաբերում է ոչ միայն մարզչին։ Նոր ղեկավարություն, նոր մասնագետներ ակումբի «օֆիսային» հատվածում, աշխատանք շատ կա անելու։ Իսկ նոր մարզչից պահանջները շատ են լինելու և դա հստակ պետք է գիտակցի ցանկացած մասնագետ, ով կստանձնի գլխավոր մարզչի պաշտոնը։ Ակումբի ղեկավարությունն էլ, մինչև նոր կրճատումներ անելը կամ նոր ցանկապատ կառուցելը, պետք է հստակ ծրագիր կազմի՝ ո՞ւր և ինպե՞ս է գնալու ակումբը նոր ճանապարհով՝ նոր մարզչի ղեկավարությամբ։ Հետևողական լինի այդ հարցում ու կարևորը՝ համբերատար։ Պետք է հստակ ծրագիր կազմվի, հասկանալի ծրագիր․․․ ինչևէ՝ Մանչեսթերում եկել է փոփոխությունների ժամանակը․․․
