CBS Sports-ի տաղավարում Քեյթ Աբդոն, Թիերի Անրին, Ջեյմի Կարագերը և Միկա Ռիչարդսը քննարկել են Չեմպիոնների լիգայի երեկվա խաղերը։ Հաղորդավարը առաջարկել է գործընկերներին խոսել առաջիկա «Ոսկե գնդակի» հանձնման արարողության մասին, որը տեղի կունենա Փարիզում՝ հոկտեմբերի 28-ին։
Դորտմունդի «Բորուսիայի» հետ խաղում Վինիսիուսի հեթ-տրիկից հետո թվում էր, թե գլխավոր թեկնածուի հարցը փակված է։ Սակայն CBS-ի փորձագետներն ունեն մեկ այլ ֆավորիտ՝ Ռոդրին։
Ռիչարդսը հակիրճ էր. «Ես դեռ իմ ձայնը տալիս եմ Ռոդրիին՝ նրա անցած մրցաշրջանի ելույթների համար»։
Միկային աջակցեց Անրին՝ նշելով․ «Ես կողմ եմ Ռոդրիին։ Ժամանակին ցանկանում էի, որ մրցանակը ստանային Խավին և Ինիեստան։ Մարդիկ մոռանում են կիսապաշտպաններին և այն ամենի մասին, ինչ նրանք անում են։ Նրանք թիմի սիրտն են։ Ռոդրին էլ «Մանչեսթեր Սիթիի» սիրտն է։ Գիտեմ, որ նա Չեմպիոնների լիգան չի հաղթել [անցած մրցաշրջանում], բայց նա հաղթել է Եվրոն [Իսպանիայի հավաքականի հետ]։
Իսկ Վինիսիուսն իրեն լավ չդրսևորեց Ամերիկայի գավաթի խաղարկությունում, բայց արդյո՞ք նա արժանի է այդ տիտղոսին [«Ոսկե գնդակ»]: Այո։ Նա զարմանալի խաղացող է, ես չեմ դադարի դա կրկնել։ Ես կասեի, որ հիմա նա աշխարհի լավագույն հարձակվողն է։ Այնպես որ, նա արժանի է այս մրցանակին»։
Կարագերն իր ձայնը տալիս է բրազիլացուն.
«Ես կընտրեի Վինիսիուսին։ Նրանք հաղթեցին Չեմպիոնների լիգան, ինչը ակումբային ֆուտբոլի ամենակարևոր նվաճումն է։ Ռոդրիին համար դժվար է՝ իր դիրքի պատճառով… շատ քիչ ֆուտբոլիստներ են «Ոսկե գնդակ» ստանում, երբ խաղում են այդ դիրքում՝ լինի դա պաշտպան, թե հենակետային կիսապաշտպան։
Գուցե և Ռոդրին պետք է հաղթեր, բայց միշտ նախընտրությունը տրվում է հարձակվողներին՝ հենց այդ պատճառով են նրանց մեծ գումար վճարում։ Հենց այդ պատճառով են նրանք այդքան թանկ արժենում, քանի որ նրանք են ոգևորում մարդկանց, ստիպում նրանց ոտքի կանգնել»։
«Մադրիդը» կարծում էր, որ գնում է աշխարհի լավագույն ֆուտբոլիստին [Մբապեին], երբ արդեն ուներ աշխարհի լավագույն խաղացողին։ Վայելիր քո «Ոսկե գնդակը», Վինի», — ավելացրել է Ջեյմին։
