«Ուրարտուի» ակադեմիայի տնօրեն Արաս Օզբիլիզը ArmSport.am-ի հետ զրույցում անդրադարձել է ակադեմիայի գործունեությանը, խոսել մանկապատանեկան առաջնություններում «Ուրարտուի» թիմերի ելույթներին, ինչպես նաև խոսել է ՀՖՖ-ի շուրջ ստեղծված իրավիճակի մասին:
— Արաս, որոշակի ժամանակ անցել է, ինչ հանդիսանում եք «Ուրարտուի» ակադեմիայի տնօրենը։ Այս պահին ինչպե՞ս եք զգում Ձեզ այս պաշտոնում:
— Ես ամենասկզբից էլ վստահ էի ինձ զգում։ Մարդիկ տեսնում են փոփոխությունն ակադեմիայում, իսկ երբ գնահատում են՝ ուրախացնում է ինձ։ Ես իմ ճանապարհից չեմ շեղվելու, կողքս ունեմ երկու շատ լավ մասնագետներ՝ Արսեն Պետրոսյանին և Արամ Հակոբյանին, և նրանց հետ պետք է մեր նպատակները իրականացնենք։
— Մանկապատանեկան առաջնությունները սկսվել են, թիմերի հանդիպումներին հետևել եք։ Ի՞նչ առաջխաղացում եք նկատել ակադեմիայի ֆուտբոլիստների մեջ
— Ակադեմիայում 2013 ու 2014 թվականներից բացի մնացածը մասնակցում են ֆեդերացիայի առաջնություններին։ Սա բացառիկ է, և մյուս ակումբներում նման բան չկա։ Ինձ համար անչափ կարևոր է, որ երեխան մշտապես մասնակցի հանդիպումներին։ Մենք սպասարկում ենք բոլոր երեխաներին և ունենք որակային տարբեր թիմեր։ Մենք ունենք թիմեր, որոնք դեռևս պարտություն չեն կրել։ Այո, մեզ համար արդյունքն առաջնային լինել չի կարող, բայց ինչքան երեխան մեծանում է, այդքան արդյունքի տոկոսային կարևորությունը բարձրանում է, բայց փոքր տարիքայինների մոտ արդյունքն առհասարակ կարևոր չէ, այլ կարևոր է նրանց մասնակցությունը ներքին առաջնություններում։
— ՀՖՖ նախագահի ընտրություններից անցել է գրեթե մեկ տարի, որին մասնակից էիք նաև Դուք։ Այս պահին երկրպագուները անվստահություն են հայտնում գործող նախագահ Արմեն Մելիքբեկյանին։ Դուք նման բան այն ժամանակ կանխատեսու՞մ էիք։
— Հնարավոր է, որ անվստահությունը մի փոքր սխալ բառ է, բայց այն, որ պրոֆեսիոնալիզմն ու կոմպետենտությունը բացակայում են՝ փաստ է. այդ իսկ պատճառով ես դրել էի իմ թեկնածությունը։ Այն, ինչը հիմա տեսնում են երկրպագուները, ես կանխատեսել էի 2 տարի առաջ։ Երկրպագուներն ասում են, որ գլխավոր մարզչի հեռացումը քիչ է, իսկ ես վաղուց էի նշում, որ պետք են համակարգային փոփոխություններ, այնպես որ սա կանխատեսելի էր։
— Երկրպագուներն այժմ պահանջում են Արմեն Մելիքբեկյանի հրաժարականը։ Ի՞նչ կարծիք ունեք այս մասին:
— Կարծիք չունեմ, ու ճիշտ չէ, որ ես արտահայտվեմ այս մասին հիմա։ Երբ Արմեն Մելիքբեկյանը հրաժարական կտա, այդ ժամանակ կխոսեմ։
