Եվրագավաթային մրցաշրջանը հայկական թիմերից շարունակվում է միայն «Նոայի» համար: Թիմն այսօր սկսում է աշնան ամենակարևոր փուլը՝ Կոնֆերենցիաների լիգայի ձևափոխված խաղարկության Լիգայի փուլի շրջանակում սեփական հարկի տակ ընդունելով չեխական «Մլադա Բոլեսլավին»:
Որակավորման փուլում Ռուի Մոտայի սաները բավական հետաքրքիր ու բարդ ճանապարհ անցան, իսկ Լիգայի փուլ դուրս եկան՝ սահմանելով մի շարք ռեկորդներ։ Երևանյան թիմը եվրոպական 50 թիմերից միակն էր, որը պայքարը սկսելով որակավորման առաջին փուլից՝ հաղթահարեց 4 փուլ։
«Նոան» նաև ընթացիկ մրցաշրջանի որակավորման փուլերի ամենախոշոր հաշվով հաղթանակը տարավ՝ 7։0 հաշվով ջախջախիչ հաղթանակ տանելով Մալթայի «Սլիմա Ուոնդերերսի» նկատմամբ։
Անհնարին ոչինչ չկա
Ռուի Մոտայի սաներն արդեն ապացուցել են, որ անգամ ամենաբարդ իրավիճակներից կարող են պատվով դուրս գալ, լինել միասնական ու պայքարել մեկ նպատակի համար: Պորտուգալացի մասնագետը, մատնանշելով իր թիմի ուժեղ կողմերը, մշտապես նախևառաջ առանձնացնում է մեկ ընտանիքի պես լինելու հանգամանքը: Հավատացած ենք՝ հենց միասնականությունը, մեկ գաղափարի շուրջ համախմբվածութունն ու նաև քրտնաջան աշխատանքը կարող են ցանկացած իրավիճակում խնդիրներ լուծել ու օգնել՝ գլխից բարձր թռչել:
Իհարկե, այս փուլում ոչ հեշտ մրցակիցներ են լինում, ոչ էլ հեշտ խաղեր, բայց կարևոր է՝ «Նոան» ջանքեր չխնայի պատվախնդիր ելույթ ունենալու համար՝ միևնույն ժամանակով առավելագույնս օգուտ քաղելով հեղինակավոր մրցակիցների դեմ խաղալու փորձառությունից, ինչպես նաև վայելելով խաղադաշտում անցկացրած ամեն րոպեն:
12-րդ խաղացողը՝ հզոր ուժ
Լիգայի փուլը «Նոան» մեկնարկում է հարազատ պատերի ներքո՝ սեփական երկրպագուների աջակցությամբ, իսկ սա մեծ առավելություն է: Ավելորդ է ասել, թե այս պատասխանատու փուլում որքան կարևոր է յուրաքանչյուր ֆուտբոլասերի ներկայությունը հենց մարզադաշտում՝ տեղում ոգևորելու ու աջակցելու հայկական ակումբի ֆուտբոլիստներին, որոնք կռիվ են տալու իրենց ակումբի, բայց նաև երկրի պատիվը բարձր պահելու համար:
Եվ, ուրեմն՝ բոլորս դեպի «Հանրապետական» մարզադաշտ՝ միասին կերտելու հայկական ակումբային ֆուտբոլի պատմության կարևոր օրերից մեկը:
