Հայաստանի գործող գավաթակիր «Արարատ-Արմենիան» այսօր՝ օգոստոսի 13-ին մեկնել է Հունգարիա։ Վարդան Մինասյանի սաները օգոստոսի 15-ին Կոնֆերենցիաների լիգայի խաղարկության որակավորման երրորդ փուլի պատասխան խաղում կհյուրընկալվեն հունգարական «Պուշկաշ Ակադեմիային»։
Հիշեցնենք, որ պատասխան հանդիպումը կկայանա օգոստոսի 15-ին, Երևանի ժամանակով 23։00-ին։ Թիմերի միջև կայացած առաջին խաղում երևանյան ակումբը պարտվել էր նվազագույն հաշվով (0:1):
Այսօր կայացել է Վարդան Մինասյանի և ժոաո Կեյրուշի նախախաղային ասուլիսը․
Հարց. Վաղը «Պուշկաշ Ակադեմիայի» հետ երկրորդ խաղն է, ասացեք, խնդրում եմ՝ ինչ ակնկալիքներ ունեք վաղվա հանդիպումից:
Ժոաո Կեյրուշ.
— Առաջին հերթին՝ ես բարդ հանդիպում եմ ակնկալում, ինչպես և նախորդ շաբաթ: Բայց ես կարծում եմ, որ մենք լավ ենք նախապատրաստվել վաղվա խաղին:
Վարդան Մինասյան.
— Մենք արդեն բավականաչափ լավ գիտենք միմյանց, շատ ավելի լավ, քան նախորդ խաղից առաջ: Ինչ վերաբերում է վաղվա խաղին, ապա ես կարծում եմ, որ մրցակիցը մի փոքր ավել առավելություն ունի, քանի որ հաղթել է առաջին խաղում, ինչպես նաև խաղում է սեփական հարկի տակ: Բայց մեզ համար դա նշանակություն չունի: Մենք ունենք հնարավորություն ու պիտի պայքարենք այդ հնարավորության համար:
Ո՞րն է առաջին խաղի հետ տարբերությունը
Վարդան Մինասյան.
— Դուք ի նկատի ունե՞ք հաշիվը, թե՞ թիմերի միջև տարբերությունը: Պարզապես այս մակարդակում խաղի ելքը լուծում են մանրուքները: Մեզ չբավականացրեց խաղային կենտրոնացվածությունը: Բայց եթե մենք կենտրոնացած խաղայինք ողջ խաղի ընթացքում, ապա, կարծում եմ, որ մրցակցից ավելի շատ շանս կունենայինք: Այնպես որ կրկնվեմ՝ այս մակարդակում մանրուքներն են լուծում խաղի ելքը:
Ժոաո Կեյրուշ.
— Մենք իսկապես լավ խաղ ցուցադրեցինք առաջին հանդիպմանը: Ու ինչպես նշեց մարզիչը՝ մանրուքներն իսկապես մեծ նշանակություն ունեն: Ես կարծում եմ, որ նախորդ խաղից հետո ողջ թիմը մի փոքր հիասթափված էր, քանի որ մենք կարծում ենք, որ մենք ավելի լավ արդյունքի էինք արժանի: Ինչևէ, մենք շատ լավ նախապատրաստվել ենք ու պատրաստ ենք վաղվա օրվան:
Ում կառանձնացնեք մրցակցի կազմում։
Վարդան Մինասյան.
— Գիտեք, «Պուշկաշ Ակադեմիան» շատ բալանսավորված թիմ է, բայց ինձ վրա ամենի շատ տպավորություն է գործել դարպասապահը: Ինչո՞ւ: Որովհետև նա շատ երիտասարդ է, բայց խաղում է փորձառու ֆուտբոլիստի պես: Այնպես որ նրա՝ դիրքի ընտրությունն ու նրա հանգստությունն ինձ տպավորեցին:
Աղբյուր՝ «Արարատ-Արմենիայի» մամուլի ծառայություն։
