ԵՎՐՈ 2024-ի մեկնարկին մնացել են հաշված օրեր։ 6 խումբ, 24 հավաքական ու մեկ գավաթ, որը բաժին կհասնի «հին աշխարհամասի» ամենաուժեղ ընտրանուն։ Նախորդ մրցաշարի հաղթողն Իտալիայի ընտրանին է, որը փորձելու է ամեն գնով կրկնել իր հաջողությունը։ Առաջնության պատմության մեջ միայն մեկ հավաքականի է հաջողվել երկու անգամ անընդմեջ դառնալ Եվրոպայի չեմպիոն. 2008-ին Իսպանիան՝ Ինյակի Սաեսի գլխավորությամբ, նվաճեց գավաթը, այնուհետև, 4 տարի անց՝ արդեն Վիսենտե դել Բոսկեի գլխավորությամբ կրկնեց իր հաջողությունը։
Այսպիսի թվեր, վիճակագրություններ ու ինտրիգներ շատ կան։ Առաջիկա օրերի ընթացքում ArmSport-ը ձեր դատին է հանձնելու Գերմանիայում կայանալիք Եվրոպայի առաջնության բոլոր մասնակիցներին, գլխավոր մարզիչներին, գլխավոր աստղերին և այլ հետաքրքիր փաստեր ու փաստարկներ։ A խմբին արդեն ծանոթացրել ենք։
Այսօր ներկայացնում ենք B խմբի ներկայացուցիչներին։
ԻՍՊԱՆԻԱ
Իսպանիայի հավաքականը որակավորման փուլում առաջին տեղում առաջ է անցել Շոտլանդիայից և Հոլանդի Նորվեգիայից: Երկու անգամ հաղթել է Վրաստանին ու Խվիչային։ Որակավորման փուլում գրանցվել է 7 հաղթանակ և 1 պարտություն։
ԻՆՉՈՒ՞ ԵՐԿՐՊԱԳԵԼ
- Հարգանքի տուրք ավանդույթներին․ ժամանակն է Իսպանիա վերադարձնելու գավաթները:
- Դեռահաս առաջնորդ․ ոչ մի բարձրակարգ թիմ չունի իր սեփական Յամալին:
- Սեր՝ ծովի, արևի, գինու և իսպանական ուտեստների նկատմամբ․ մի խոսքով՝ այն ամենը, ինչը գովերգում էր Էռնեստ Հեմինգուեյը։
ԻԴԵԱԼԱԿԱՆ ԿԱԶՄ
Սիմոն — Կարվախալ, Լե Նորման, Լապորտ, Գրիմալդո — Ռոդրի, Պեդրի — Յամալ, Օլմո, Ուիլյամս — Մորատա
ԹԻՄԻ ԳՈՐԾԵՐԸ
Իսպանիան այս պահին ամենաուժեղ կազմը չունի։ Նշանավոր խաղացողների թվում են հենակետային կիսապաշտպան Ռոդրին և եզրային պաշտպան Դանի Կարվախալը՝ լավագույններն իրենց դիրքերում: Մյուս գծերի մասին նույնը չէինք ասի։ Մշտական վնասվածքների պատճառով Պեդրին լավ մարզավիճակում չէ։ Գավին բաց կթողնի մրցաշարը՝ խաչաձեւ կապանների պատռվածքի պատճառով։ Ինչպես միշտ, չկա բարձրակարգ հարձակվող․ Ալվարո Մորատան լավագույն տարբերակը չէ, Խոսելուն էլ տարօրինակ մարզավիճակում է։ Պաշտպանության առաջատարը 30-ամյա Էմերիկ Լապորտն է, որը հանդես է գալիս Սաուդյան Արաբիայում։ Նրան կզուգակցեն Ռոբին Լե Նորմանը՝ «Սոսյեդադից», կամ Դանիել Վիվիանը՝ «Ատլետիկից»:
ԽԱՂԱՈՃԸ
Թիմն ունի նաև «ինքնության» խնդիրներ։ Իսպանիան չի որոշել՝ որ ուղղությամբ զարգանալ. կենտրոնանալ նախկինում աշխատած գաղափարների վրա, թե՞ հեռանալ Էնրիկեի «գծագրերից», քիչ պահել գնդակը և ավելի պրագմատիկ խաղալ: Երկրորդ տարբերակն ավելի օպտիմալ է թվում, բայց իսպանական հպարտությունը դա թույլ չի տալիս։ Բա 1 րոպեում 40 փոխանցում ո՞վ կատարի։
ՄԱՐԶԻՉԸ
Լուիս դե լա Ֆուենտեն 62 տարեկան է, երիտասարդների նախկին մարզիչն է։ Նա «Ալավեսը» գլխավորելու փորձ ունի, պատասխանատու էր նաև «Ատլետիկի» երիտասարդների համար։ Սա նրա առաջին խոշոր մրցաշարն է։ Դե լա Ֆուենտեն այն մարզիչներից է, որը սիրում է հարմարվել իր մրցակիցներին: Իսպանիան խաղում է կոմպակտ՝ իրեն բնորոշ 4-3-3 սխեմայով, որը վերածվում է 4-2-3-1-ի և 4-4-2-ի:
ՓԱՍՏ
Չեք հավատա՝ Իսպանիայի հավաքականում մինչև օրս հանդես է գալիս 38-ամյա Խեսուս Նավասը՝ միակը այն նույն «Ֆուրիա Ռոխայից», որը գերիշխող էր ֆուտբոլային քարտեզի վրա: Նավասը հիմնական կազմի խաղացող չէ, բայց, անհրաժեշտության դեպքում, կարող է հանգիստ փոխարինել Կարվախալին։ 2023 թվականի աշնանը նա սահմանեց եզակի ռեկորդ՝ պատմության մեջ առաջինն էր, որը նվաճեց Աշխարհի գավաթը, հաղթեց Եվրոն և Ազգերի լիգան։ Նա կարող էր ավելին գրանցել, եթե չլինեին խուճապային գրոհները. դրանց պատճառով շատ երիտասարդ Նավասը չխաղաց ազգային թիմում և բաց թողեց հաղթական Եվրո-2008-ը:
ԱՌԱՋԱՏԱՐԸ
Խաղը կառուցված է «Մանչեսթեր Սիթիի» հենակետային կիսապաշտպան Ռոդրիի շուրջ: Նրան կարելի է անվանել նոր ՍերԺիո Բուսկետս՝ ելնելով նրա՝ Իսպանիայի վրա ունեցած ազդեցության աստիճանից։ Առանց Ռոդրիի տուժում են խաղային բոլոր մեխանիզմները։ Խաղի կրեատիվության պատասխանատուն «Բարսայի» 16-ամյա հրաշամանուկ Լամին Յամալն է, որն իր վրա է վերցնում առավելագույնը և չի վախենում իրավիճակի սրումից:
ԽՈՐՎԱԹԻԱ
Նյարդայնացած խորվաթները Թուրքիայի հետևից իրենց ընտրական խմբում զբաղեցրին երկրորդ տեղը։ Դժվարությամբ հաղթահարեցին Ուելսի արգելքը: Ընտրական փուլի թվերը խոսուն ապացույցն են՝ 5 հաղթանակ, 1 ոչ-ոքի և 2 պարտություն:
ԻՆՉՈՒ՞ ԵՐԿՐՊԱԳԵԼ
- Յուրահատուկ շախմատաձև մարզահագուստ, որը չես հանդիպի ուրիշ ոչ մի հավաքականի մոտ։
- Հայաստանի ընտրանին օգնեց Խորվաթիային նվաճել խմբի երկրորդ ուղեգիրը եզրափակիչ։
- Մոդրիչ. եվ ընդհանրապես, մի՞թե միայն նա բավական չէ։
- Այո, գուցե բավական չէ. այդ դեպքում՝ Իվանա Նոլ՝ աշխարհի ամենահայտնի երկրպագուհին։
ԻԴԵԱԼԱԿԱՆ ԿԱԶՄ
Լիվակովիչ — Ստանիսիչ, Շուտալո, Գվարդիոլ, Սոսա — Մոդրիչ, Բրոզովիչ, Կովաչիչ, — Կրամարիչ, Բուդիմիր, Իվանուշեց.
ԹԻՄԻ ԳՈՐԾԵՐԸ
Խորվաթներն ապրում են մտահոգիչ սերնդափոխություն։ Մոդրիչը 38 տարեկան է, Մարցելո Բրոզովիչը՝ 31, խաղում է Սաուդյան Արաբիայում։ Մատեո Կովաչիչը վերջերս նշեց իր 30-ամյակը, սակայն գերօգտակար է «Մանչեսթեր Սիթիում»: 35-ամյա Իվան Պերիշիչը հրավիրվել է վերջնական կազմ՝ թեպետ կարիերայի վերջին տարիներն անցկացնում է հայրենիքում։
Կա հարձակման խնդիր. Մարիո Մանջուկիչի հեռանալուց հետո դեռևս չի հայտնվել թոփ հարձակվող, իսկ Անդրեյ Կրամարիչը «Հոֆենհայմում» սովորաբար չի խաղում հիմնական կազմում: Փոխարենը, կա Անտե Բուդիմիրը, որը հիանալի մրցաշրջան անցկացրեց «Օսասունայում»՝ դառնալով 18 գոլի հեղինակ:
ՄԱՐԶԻՉԸ
Կարելի է անվերջ նայել հոսող ջրին, վառվող կրակին և Խորվաթիայի հավաքականը մարզող Զլատկո Դալիչին՝ միջազգային ֆուտբոլի հնաբնակներից մեկին։ Նա աշխատում է թիմի հետ 2017 թվականի աշնանից, իսկ վերջերս երկարաձգել է պայմանագիրը մինչև 2026 թվականը։ Դալիչին սիրում են Խորվաթիայում, քանի որ նրա հետ են կապված հավաքականի հիմնական ձեռքբերումները, և ցանկանում են, որ հենց ինքը երիտասարդացում մտցնի թիմում։
ԽԱՂԱՈՃԸ
«Շախմատավորները» պրագմատիկ և փորձառու հավաքական են։ Արդյունավետ են տարբեր ռեժիմներում՝ ավտոբուս կայանելու, դաշտի կենտրոնում գնդակի վերահսկման և այլն։ Խորվաթիան կարող է տարբեր լինել, բայց մնում է պահպանողական: Նրանք խաղում են 4-3-3 դասավորությամբ, իսկ երբեմն Մոդրիչը բարձրանում է վերև, և թիմն անցում է կատարում 4-2-3-1-ի: Լուկա Իվանուշեցի և Անդրեյ Կրամարիչի արագ եզրերը գնդակը հասցնում են կենտրոնական հարձակվողին․․․ Շատ անդուր է ստացվում մրցակցի համար։
ՓԱՍՏ
Իվան Ռակիտիչը երկու տարով փոքր է Մոդրիչից, բայց նա նույնիսկ չկատարեց ազգային հավաքականի դեսպանի դերը։ Հրաժարվեց, որպեսզի վայելի ժամանակը՝ որպես հավաքականի երկրպագու:
ԱՌԱՋԱՏԱՐԸ
Մոդրիչը այսօրվա Խորվաթիայի ավագն է, սիրտը, ուղեղն ու հոգին: Լուկան հիմա Մադրիդի «Ռեալում» հիմնական խաղացողը չէ, բայց ազգային հավաքականում անփոխարինելի է։ Պրեմիեր լիգայի լավագույններից մեկը՝ պաշտպան Յոշկո Գվարդիոլը, հիանալի մրցաշրջան անցկացրեց «Մանչեսթեր Սիթիի» կազմում։ Առանձնացնենք նաև «Վոլֆսբուրգի» 26-ամյա առաջատար Լովրո Մայերին, որը կարող է հաճելիորեն զարմացնել։
ԻՏԱԼԻԱ
Իտալայի հավաքականը տանջեց իր երկրպագուներին մինչև որակավորման վերջին փուլը՝ Ուկրաինայի հավաքականի հետ պայքարելով երկրորդ տեղի համար։ Ամեն ինչ հաջող ստացվեց՝ գոլազուրկ ոչ-ոքի, անցում Անգլիայի հետևից։ Իտալիան ունի բարդ խնդիր՝ տիտղոսի պաշտպանություն։ Որակավորման փուլում թիմը հակասական տեսք ու տպավորություն թողեց՝ 4 հաղթանակ, 2 ոչ-ոքի և 2 պարտություն։
ԻՆՉՈՒ՞ ԵՐԿՐՊԱԳԵԼ
- Անփոխարինելի իտալական կիրք։
- Ջերմ հիշողություններ՝ Սպալետտիի գլխավորած Նապոլիից։
- Եթե դուք պիցցայի ու պաստայի սիրահար եք ու տեսել եք Տոտտիի ու Բաջոյի խաղը։
ԻԴԵԱԼԱԿԱՆ ԿԱԶՄ
Դոննարումմա — Դարմիան, Մանչինի, Բաստոնի — Դի Լորենցո, Բարելլա, Ժորժինյո, Դիմարկո — Կիեզա, Պելեգրինի — Սկամակա
ՄԱՐԶԱՎԻՃԱԿԸ
Իտալիան հիմա ապրում է «հետմանչինյան» դարաշրջան. մարզիչը հեռացավ, փոխվեց ոչ միայն ոճը, այլև կազմը։ Ջորջիո Կյելինին և Լեոնարդո Բոնուչին հեռացան, Չիրո Իմոբիլեն ավարտեց միջազգային կարիերան։ Սկսեցին հրավիրվել երիտասարդների՝ Ալեսանդրո Բուոնջորնոն՝ «Տորինոյից», «Բոլոնիայի» աստղ Ռիկարդո Կալաֆիորին…։ Ազգային թիմը որակի պակաս ունի, աչքի է ընկնում «Ինտերի» ուժեղ կորիզը՝ Բաստոնի-Բարելլա, բայց մնացած դիրքերում ամեն ինչ միջին մակարդակի է։ Ֆեդերիկո Կիեզան լավագույն մարզավիճակում չէ, Ժորժինյոն ծերանում է, Դոննարուման հակասական մրցաշրջան անցկացրեց ՊՍԺ-ում։ «Աձձուրայի» գլխավոր ռմբարկուն դարձավ Ջանլուկա Սկամակկան՝ «Ատալանտայից»:
ԽԱՂԱՈՃԸ
Թիմը խաղում է երեք կենտրոնական պաշտպանով՝ այս սխեման վերցրված է «Ինտերի» խաղաոճից: Դրա հետ Սպալետտին հաշվի է նստում՝ թեպետ միշտ սիրել է խաղալ պրագմատիկ 4-3-3 դասավորությամբ։ Իտալիան սիրում է վերահսկել գնդակը, երկու «ֆանտազիստա» է գործում սովորաբար՝ Լորենցո Պելեգրինին և Նիկոլո Զանիոլոն: Ի դեպ, երկրորդը հավաքական չի հրավիրվել։ Ի՞նչ է անելու Սպալետտին՝ չգիտի ոչ-ոք։
ՄԱՐԶԻՉԸ
Չեմպիոն «Նապոլիի» «ճարտարապետ» Լուչիանո Սպալետտին ասել է, որ միշտ երազել է աշխատել ազգային հավաքականի հետ, և արագ է համաձայնել առաջարկին։ Բնականաբար, նա սկսեց աշխատել Մանչինիի թողած ժառանգության հետ, բայց աստիճանաբար փոխեց թիմը՝ մտցնելով նոր գաղափարներ։ Մարզիչը կենտրոնացած է ֆիզիկայի վրա։ Իտալիայի ցուցադրած ֆուտբոլը չհիացրեց ընտրական փուլում, սակայն Սպալետտին փոփոխություններ է խոստացել։ Գուցե լինեն նաև տակտիկական փորձարկումներ։
ՓԱՍՏ
Մանչինիի օրոք անփոխարինելի Մանուել Լոկատելլին այս անգամ Եվրոպայի առաջնությանը չի մասնակցելու։ Սպալետտին տարօրինակ մրցաշրջանի պատճառով նրան չի ընդգրկել նույնիսկ ընդլայնված կազմում։ Փոխարենը նա հրավիրել է Նիկոլո Ֆաջոլիին, որը նոր է կրել 7 ամսվա որակազրկման պատիժը։
ԱՌԱՋԱՏԱՐԸ
«Ինտերի» շարժիչը Նիկոլո Բարելլան է՝ աշխարհի լավագույն կիսապաշտպաններից մեկը, եզակի խաղացող՝ առանց ակնհայտ թուլությունների։ Բարելլան լավ է ինչպես հարձակման ժամանակ, այնպես էլ պաշտպանությունում: Իտալիան մարզական թիմ է՝ առանց բացահայտ գերաստղերի, բայց Սպալետտիի ծրագրերի վրա ամենամեծ ազդեցությունն ունի հենց Նիկոլոն: Գնդակի առաջընթացը հաճախ անհնար է առանց Բարելլայի։
ԱԼԲԱՆԻԱ
Ալբանիան անցավ որակավորման տարօրինակ մրցաշար՝ առաջին տեղը գրավելով Չեխիայի, Լեհաստանի և Մոլդովայի հետ միևնույն խմբում։ Հավաքականն ամենաուժեղներից չէր, բայց աշխույժ տեսք ուներ ու կարողանում էր անակնկալի բերել իրենից ոչինչ չսպասող մրցակիցներին: 4 հաղթանակ, 3 ոչ-ոքի և միայն 1 պարտություն Լեհաստանից. Համաձայնեք՝ սոլիդ ցուցանիշ է։
ԻՆՉՈՒ՞ ԵՐԿՐՊԱԳԵԼ
- Անդերդոգ, որից ոչինչ չի սպասվում։ Սա նշանակում է, որ դուք հաստատ ստիպված չեք լինի ավելորդ նյարդայնանալ:
- Եթե սիրում եք պատմություններ, որտեղ համեստ և թույլ գյուղացիները խելացի և ուժեղ են գտնվում հարուստ քաղաքաբնակներից, ապա Ալբանիան ձեր սրտի թիմն է։
- Եթե դուք օլդսքուլ ֆուտբոլի սիրահար եք և հիշում եք Իգլի Տարեին, Ալբանիան հաստատ ձեզ օտար չի լինի։
ԻԴԵԱԼԱԿԱՆ ԿԱԶՄ
Ստրակոշա — Բալիու, Կումբուլա, Ջիմսիթի, Միթայ — Ռամադանի, Ասլանի — Ասանի, Գյասուլա, Բայրամի — Մանայ
ՄԱՐԶԱՎԻՃԱԿԸ
Թիմը վատ վիճակում չէ։ Պատմության մեջ երկրորդ անգամ թիմը հասավ Եվրոպայի առաջնության եզրափակիչ փուլ՝ առաջինը 2016-ին էր։ Մի քանի լավ խաղացողներ են հայտնվել․ «Չելսիին»պատկանող հարձակվող Արմանդո Բրոյան, «Ինտերի» և«Բարսելոնայի» համակարգերում հանդես եկած Ռեյ Մանայը, «Ատալանտայի» կարևոր պաշտպան Բերատ Ջիմսիտին, «Լացիոյի» փորձառու պաշտպան Էլսեիդ Հյուսայը, Տոմաշ Ստրակոշան՝ «Բրենտֆորդի» լավագույն դարպասապահներից, թեև գրեթե չի խաղում: Ալբանիան փորձի և երիտասարդության միաձուլում է՝ զուրկ շքեղությունից և աստղերից: Նման խմբում նա, իհարկե, ունի վտարվածի կարգավիճակ, բայց զգուշությունն աստղազարդ Իտալիային ու Իսպանիային չի խանգարի։
ԽԱՂԱՈՃԸ
Թիմը խաղում է ցածր բլոկով և սուր հակագրոհներով։ Նրանց հետ հարմար է խաղալ, եթե մրցակիցը կազմով նկատելիորեն ուժեղ է: Թիմը դեմ չէ անհրաժեշտության դեպքում ավտոբուս կանգնեցնել կանգառում։ Կարող են անվերջ բարձրից փոխանցումներ կատարել՝ հեչ չեն նեղվում այդ փաստից։ Ալբանիայի հարձակման փիլիսոփայությունը հետևյալն է. սպասել, այնուհետև պատռել եզրերը և կրակել կենտրոնով: Եթե չի ստացվում՝ էլի սպասել։ Ու էլի սպասել․․․ Սպասել այնքան, մինչև գոլ չխփեն։ Նրանք կոպիտ չեն խաղում, շատ խախտումներ չեն անում, բայց խաղում են հոգնեցնող ֆուտբոլ՝ խիստ կանխատեսելի: Ամենից հաճախ նրանք դաշտ են դուրս բերում չորս պաշտպան, սովորաբար, երկու կազմավորում՝ 4-1-4-1 և 4-2-3-1 սխեմաները՝ ունենալով կազմում բարձրահասակ հարձակվող:
ՄԱՐԶԻՉԸ
Թիմի ղեկին կանգնած է Սիլվինյոն, որը 2000-ականներին խաղացել է «Արսենալում», «Բարսայում» և «Մանչեսթեր Սիթիում»: Բրազիլացին անհաջող աշխատեց «Լիոնի» և «Կորինտիանսի» ղեկին, սակայն նա, կարծես, խոր արմատներ է գցել Ալբանիայում և մեծ հարգանք է վայելում խաղացողների կողմից։ Թիմում մթնոլորտը բարձր մակարդակի վրա է։ Այդ մասին փաստում են ֆուտբոլիստներն ու երկրպագուները:
ՓԱՍՏ
Ալբանիայի մարզչական շտաբում աշխատում է 39-ամյա Պաբլո Սաբալետան, ով հայտնի է «Ման Սիթիից»։ Նա ավարտել է կարիերան 2020 թվականին, այժմ սա իր առաջին մարզչական փորձն է։ Շտաբում է նաև Դարիվան՝ 1998 թվականի Բրազիլիայի հավաքականի անդամ, որը դարասկզբին խաղացել է «Պորտուում» կամ «Սելտայում», ևս մի քանի տարի անցկացրել է «Միդլսբրոյում»:
ԱՌԱՋԱՏԱՐԸ
Ալբանիայի ընտրանին ունի երիտասարդ շարժիչ ուժ. Քրիստիան Ասլանին չեմպիոն «Ինտերի» կարևոր դետալներից է։ Նրա վարպետությունը շատ է հավանում Սիմոնե Ինձագին: Շատերը Քրիստիանին համեմատում են Մարցելո Բրոզովիչի հետ։ Երբեմն լինում են ավելի համարձակ տարբերակներ, օրինակ՝ անալոգիաներ Անդրեա Պիռլոյի հետ: Այս պահին նա այդքան էլ լավ մարզավիճակում չէ, շատ է սխալվում, բայց հեռանկարները գերազանց են։ Այս թիմում Ասլանին գլխավոր ստեղծագործող մարդն է։
Ռոբերտ Գասպարյան
