«Մանչեսթեր Յունայթեդը» հետաքրքրված է «Քրիսթալ Փելասի» ֆրանսիացի կիսապաշտպան Մայքլ Օլիսեի տրանսֆերով: Այս մասին հայտնում է Evening Standard-ը։
Աղբյուրի համաձայն, խաղացողը դիտարկվում է «Մանչեսթեր Յունայթեդի» կողմից որպես տրանսֆերային նպատակ՝ 2023/2024 մրցաշրջանի ավարտից հետո պլանավորված հայտացուցակի թարմացման շրջանակում: Օլիսեն նախկինում չորս տարվա պայմանագիր է կնքել «Քրիսթալ Փելասի» հետ 2023 թվականի օգոստոսին, սակայն նրա նոր պայմանագիրը ներառում է ազատման կետ, որն ուժի մեջ է մտնում 2024 թվականի ամռանը:
Նշվում է, որ փոխհատուցման չափն անհայտ է, բայց, ամենայն հավանականությամբ, այն զգալիորեն ավելի մեծ կլինի, քան 40,4 միլիոն եվրո գումարը, որը եղել է «Քրիսթալ Փելասի» հետ նրա նախորդ պայմանագրում:
Անգլիայի Պրեմիեր լիգայի ընթացիկ մրցաշրջանում 22-ամյա Մայքլ Օլիսեն անցկացրել է ինը հանդիպում, որոնցում դարձել է 5 գոլի և մեկ գոլային փոխանցման հեղինակ։
