Մարկ-Անդրե տեր Շտեգենը կարող է չխաղալ «Բարսելոնայում» մինչև տարեվերջ։
Հիշեցնենք, որ նոյեմբերի կեսերին դարպասապահը մեջքի ցավի պատճառով Գերմանիայի հավաքականից վերադարձել էր կատալոնական ակումբի ճամբար։ Այդ ժամանակվանից նա ոչ մի հանդիպում չի անցկացրել. խնդիրը պահպանվում է:
Պահպանողական բուժումը նկատելի արդյունքներ չի տալիս, և այս երկուշաբթի «Բարսելոնայի» մարզչական շտաբը կհանդիպի բժշկական ծառայության ներկայացուցիչների հետ՝ քննարկելու հետագա քայլերը։ Դիտարկվում է տարբերակ, որի դեպքում Տեր Շտեգենը պետք է վիրահատվի։ Այս մասին հայտնում է Diario Sport-ը։
Միգուցե կողմերը որոշեն անել առանց վիրահատության և պարզապես դարպասապահին մի քանի շաբաթ հանգիստ տան։ Այս մասին էլ գրում է AS-ը։ Այնուամենայնիվ, այս տարբերակը կապված է այն ռիսկի հետ, որ որոշ ժամանակ անց խնդիրները կկրկնվեն:
Եթե խաղացողը վիրահատվի, ապա նա բաց կթողնի չորսից վեց շաբաթ:
