Հայաստանի աթլետիկայի ֆեդերացիայի նախագահ, անվանի հեռացատկորդ, Եվրոպայի, ԽՍՀՄ-ի ու հանրապետության բազմակի չեմպիոն, Բարի կամքի խաղերի հաղթող, Եվրոպայի ռեկորդակիր Ռոբերտ Էմմիյանը ևս Լեհաստանում է՝ հետևելու Հայաստանի թիմի ելույթներին Եվրոպական ամառային երրորդ խաղերում:
ArmSport-ը Կատովիցեի «Շլյոսկի» մարզադաշտում հանդիպել է լեգենդար մարզիկին ու նրա հետ զրուցել ինչպես Հայաստանի ներկայացուցիչների ելույթների, այնպես էլ՝ ապագայի ծրագրերի, Արտաշատի Քաղաքային մարզադաշտում աթլետիկական վազքուղու կառուցման աշխատանքների ավարտի և այլնի մասին:
«Շատ ուրախ եմ, որ մեր պատվիրակությունն այսպիսի հիանալի թիմով մասնակցեց Եվրոպական ամառային երրորդ խաղերի շրջանակում առաջին անգամ անցկացվող Եվրոպայի թիմային առաջնությանը: Հիանալի ծրագիր էր, շնորհակալ եմ Օլիմպիական կոմիտեին ու ԿԳՄՍ նախարարությանը՝ այս հնարավորությունը մեզ ընձեռելու համար: Այս հիանալի մարզադաշտը համապատասխանում է միջազգային բոլոր չափանիշներին ու մեր մարզիկների համար մեծ հաճույք էր այստեղ հանդես գալը:
Ուրախ եմ, որ Հայաստանում էլ արդեն ունենք միջազգային չափանիշներին համապատասխանող վազքուղի, որն արդեն լիովին պատրաստ է: Առաջին մրցումը, որ այնտեղ կանցկացվի Համահայկական ամառային խաղերն են: Դրանից հետո կանցկացնենք Հայաստանի առաջնությունը, ապա 3-4 միջազգային մրցաշար: Ուզում եմ, որ այդ պայմանները մեզ ավելի օժանդակեն հաջողության հասնելու համար»,- նշում է Ռոբերտ Էմմիյանը:
Նրա խոսքով՝ թեև թիմային առաջնություն է, բայց մարզիկների անհատական արդյունքները շատ ոգևորող են:
«Աղասյանն առաջին տեղը գրավեց եռացատկում. շատ ուրախ եմ նրա համար: Երվանդ Մկրտչյանն ու Յանա Սարգսյանը երրորդ տեղը զբաղեցրին: Ունեցանք նաև անձնական ու ազգային ռեկորդներ: Բոլոր մարզիկներն իրենց հնարավորությունների սահմանում արեցին ամեն ինչ, որպեսզի իրենց լավ դրսևորեն: Վստահ եմ՝ երբ ունենանք լավ պայմաններ ու մեր մարզիկները բարելավեն իրենց տեխնիկական, ֆիզիկական լավ տվյալները, էլ ավելի մեծ հաջողություններ կունենան»,- ընդգծում է Էմմիյանը:
Խոսելով առաջիկա ծրագրերի մասին՝ Հայաստանի աթլետիկայի ֆեդերացիայի նախագահը շեշտում է՝ առջևում Եվրոպայի երիտասարդների ու աշխարհի առաջնությունն է. «Նպատակն Օլիմպիական խաղերն են, որպեսզի կարողանանք վարկանիշ ձեռք բերել, հատկապես, որ խաղերն անցկացվելու են Փարիզում, գիտեմ, որ հիանալի են կազմակերպված լինելու: Շատ կուզեմ ու ամեն ինչ կանենք, որպեսզի շատ մասնակիցներ ունենանք: Որակյալ մարզիկներ ունենք՝ ի դեմս Լևոն Աղասյանի, Երվանդ Մկրտչյանի, Յանա Սարգսյանի, ու այլոց, ովքեր ի զորու են վարկանիշ ձեռք բերելու:
Չմոռանամ նշել նաև Ալիսոն Հալվերսոնին, որը Հայաստանի քաղաքացիություն ստանալուց հետո առաջին անգամ էր ներկայացնում մեր երկիրը: Շատ ուրախ ու ոգևորված է: Բոլորիս համար հաճելի է նրա ներկայությունը մեր թիմում: Վերջերս է երեխա ունեցել, քիչ ժամանակ ունեցավ պատրաստվելու համար: Վստահ եմ՝ մյուս մրցումներում շատ ավելի լավ մարզավիճակում կլինի ու բարձր արդյունքներ կգրանցի՝ գնալով դեպի Օլիմպիական խաղեր»:
Հայաստանի աթլետիկայի ֆեդերացիայի նախագահ, լեգենդար Ռոբերտ Էմմիյանը նաև հաջողություն մաղթեց Եվրոպական խաղերում Հայաստանի մյուս ներկայացուցիչներին:
Հիշեցնենք՝ Լեհաստանում ընթացող Եվրոպական ամառային երրորդ խաղերի շրջանակում ավարտվել է աթլետիկայի Եվրոպայի թիմային առաջնությունը, որի արդյունքներով Հայաստանի թիմը, հանդես գալով երրորդ դիվիզիոնում, զբաղեցրել է 10-րդ հորիզոնականը:
