Բռնցքամարտիկ Էրիկ Իսրայելյանը ՀՀ քաղաքացիությունից հրաժարվելու մասին հայտարարությունից հետո տարատեսակ գրառումներ է կատարում ֆեյսբուքի իր էջում՝ անդրադառնալով նման որոշման պատճառներին:
ArmSport-ը, համադրելով մարզիկի հայտարարությունները, ԿԳՄՍ նախարարության պարզաբանումն ու նախարարի տեղակալ Կարեն Գիլոյանի մեկնաբանությունները, փորձել է ամփոփ ներկայացնել իրավիճակը:
ԿԳՄՍ նախարարի տեղակալ Կարեն Գիլոյանն ArmSport-ի հետ զրույցում նշում է, որ իմանալով բռնցքամարտիկի դժգոհությունների մասին նրան հյուրընկալել էր դեռ 2022 թվականի վերջին: Այն, որ այցելել է Էրիկի բնակարան և խոստացել օգնել տան գնման գործընթացում, Գիլոյանը ևս չի ժխտում.
«Էրիկը դժգոհ էր Հայաստանի բռնցքամարտի ֆեդերացիայի, ՀԱՕԿ-ի , պետության վերաբերմունքից: Զրուցեցի նրա հետ, բացատրեցի, որ պետք չէ դժգոհել. ամեն մեկն անում է այն, ինչ օրենսդրությամբ իրավասու է, և ոչ մի օրենքում գրված չէ, որ քեզ պետք է տուն տան: Գնացի իրենց տուն, տեսա, որ վարձով է ապրում, ասացի, որ կօգնեմ իրեն: Առաջարկեցի աջակցել, որպեսզի կարողանա հիփոթեքով բնակարան ձեռք բերել: Մարդկանց խնդրեցի՝ բրոկեր, բանկի աշխատակիցներ՝ իմ անձնական կապերի միջոցով … ասում էր՝ չգիտի, թե ինչ պետք է անել, ինչ հնարավոր էր արեցի, որպեսզի իր համար ցածր տոկոսադրույքով հիփոթեք դասավորեն: Որպես երիտասարդ հեռանկարային մարզիկի՝ խնդրում էի, որ օգնենք իրեն: Պայմանավորվեցինք՝ կընդառաջեմ ու իրեն տրամադրվող ամսական նպաստն ու անվանական թոշակը միանգամից կփոխանցվի տան հիփոթեքի վճարմանը, մնում էր, որ նա կանխավճարի հարցը լուծեր: Ամեն ինչ իր սրտով էր, շատ երջանիկ էր ու շատ շնորհակալ: Ամենօրյա կապի մեջ էի, օգնում և աջակցում էի՝ ինչպես կարողանում էի մինչ այն պահը, երբ ասաց, որ կանխավճարը չի կարող վճարել … 4,5 մլն դրամի մասին էր խոսքը: Հարցրի, թե ինչ արեց այն գումարները, որ ստացել է, ասաց՝ իսկ ես ինչո՞վ ապրեի»,- պատմում է Կարեն Գիլոյանը և մանրամասնում, թե ինչ վճարների մասին է խոսքը:
Ըստ նախարարի տեղակալի՝ տարեվերջին Էրիկ Իսրայելյանը պետությունից միանվագ ստացել է 2,3 մլն դրամ, դրան գումարած շուրջ 500 հազար դրամ ստացել է ՀԱՕԿ-ից, 250 հազար դրամ էլ ստացել է Երևանի քաղաքապետարանից, քանի որ նաև իր խնդրանքով ընդգրկվել էր երևանցի լավագույն մարզիկների տարեվերջյան տասնյակում: Ֆինանսական աջակցութուններ են եղել նաև «Դինամո» ընկերության նախագահից, անվանի բռնցքամարտիկներից.
«Այսինքն շուրջ 3 մլն 500 հազար դրամի մասին է խոսքը: Բացի այդ, նա հունվարից ամսական 450 հազար դրամ ստանում է պետությունից, 200 հազար դրամ էլ ստանում է Օլիմպիական կոմիտեից: Բնական է՝ այս գումարներով կկարողանար վճարել կանխավճարը»,- ասում է Գիլոյանը՝ ընդգծելով, որ Էրիկ Իսրայելյանը հեռանկարային մարզիկ է և այս ընթացքում մեծ հոգածությամբ՝ հարազատ երեխայի պես, աջակցել է բռնցքամարտիկին և փորձել օգնել:
ԿԳՄՍ նախարարությունն արդեն պարզաբանում է ներկայացրել՝ ֆինանսական հատկացումների մասին ավելի մանրամասն տեղեկատվություն հրապարակելով: ԿԳՄՍՆ-ից հայտնում են, որ բռնցքամարտիկը, ի թիվս ՀՀ մարզական պատիվը միջազգային հարթակներում բարձր պահած բազմաթիվ այլ մարզիկների, ստացել է սպորտային արդյունքների համար ՀՀ օրենսդրությամբ նախատեսված բոլոր պարգևատրումները, ամենամսյա թոշակն ու նպաստը:
«Մասնավորապես՝ 2022 թվականի հունվարի 1-ից՝ 1 տարի շարունակ, բռնցքամարտիկը 2021 թվականին բարձր արդյունքներ ցուցաբերելու համար ստացել է անվանական թոշակ՝ ամսական 120 հազար դրամի չափով: 2022 թվականի հունիսի 1-ից մինչև նոյեմբերի 1-ը ներառյալ «Փարիզ 2024» Օլիմպիական խաղերի նախապատրաստության համար ստացել է ամսական 150 հազար դրամ նպաստ, իսկ դեկտեմբերից՝ արդեն որպես աշխարհի երիտասարդական առաջնության հաղթող, Իսրայելյանին հասանելիք ամսական նպաստի չափը կազմել է 200 հազար դրամ: 2022 թվականի դեկտեմբերին բռնցքամարտիկը միանվագ 800 հազար դրամ տարեվերջյան պարգևատրում է ստացել՝ որպես երիտասարդների Եվրոպայի առաջնության հաղթող, ևս 1,5 մլն դրամ միանվագ աջակցություն ստացել է՝ որպես աշխարհի երիտասարդական առաջնության հաղթող:
Ի դեպ, «Փարիզ 2024» Օլիմպիական խաղերի նախապատրաստության համար մարզիկին հատկացվող նպաստը 2023 թվականի հունվարի 1-ից կազմում է ամսական 200 հազար դրամ, իսկ անվանական թոշակի չափը՝ ամսական 240 հազար դրամ»,- ասում են ԿԳՄՍՆ-ից՝ ընդգծելով, որ վերը նշված գումարները ներկայացված են՝ չներառելով հարկերը և տուրքերը:
Այսպիսով, բռնցքամարտիկի՝ միայն ԿԳՄՍՆ կողմից հատկացված պետական վճարները 2022 թվականի հունվարից առ այսօր կազմել են 5 մլն 720 հազար դրամ:
ԿԳՄՍՆ-ից պարզաբանում են նաև, որ ՀՀ կառավարությունը և ԿԳՄՍ նախարարությունը մարզական արդյունքների համար բնակարանների հատկացման ծրագիր չի իրականացնում:
Ի դեպ, տիտղոսակիր բռնցքամարտիկը չէր մասնակցում բռնցքամարտի Հայաստանի առաջնությանը, որն անցկացվեց հունվարին: ԿԳՄՍ նախարարի տեղակալի խոսքով՝ այս առումով ևս իրարամերժ տեղեկություններ կան:
«Հայաստանի առաջնությունից մեկ օր առաջ՝ հունվարի վերջին, Էրիկն ինձ հայտնեց, որ ձեռքը ցավեցրել է և չի կարողանա մասնակցել Հայաստանի առաջնությանը: Գնում եմ առաջնության բացմանը, մարզիչների հետ զրուցելիս ասում եմ՝ Էրիկը ցավեցրել է ձեռքը, ցավոք չի կարողանում մասնակցել մրցումներին, ծիծաղում են, ասում են՝ ստել է: Հետո ինձ մարզիչներն ու մարզիկները պատմում են, որ ինքն ու հայրը հայտարարություններ են տարածում, որ ինչո՞ւ պետք է մասնակցի Հայաստանի առաջնությանը, ինքն աշխարհի ու Եվրոպայի չեմպիոն է: Վերջում՝ ով կդառնա Հայաստանի չեմպիոն, սպարինգ մենամարտ կանցկացնեն, իրեն կծեծի ու կգնա աշխարհի առաջնության: Փաստորեն ՝ ինքն ամեն կերպ թելադրում է, թե երկիրն ինչ պետք է անի»,- ասում է Կարեն Գիլոյանը:
Իսրայելյանը չի մեկնաբանում, թե որ երկիր է մտադիր տեղափոխվել։ Ասում է՝ առաջարկներ շատ ունի, կմտածի ու որոշում կկայացնի, քանի որ վիրավորված է իր հանդեպ անտարբեր վերաբերմունքից։ Թե ինչպիսին կլինեն այս պատմության զարգացումները, ցույց կտա ժամանակը։
