Պեկինի ձմեռային Օլիմպիական խաղերում Հայաստանի ներկայացուցիչներից առաջինը պայքարի է դուրս եկել դահուկորդ Միքայել Միքայելյանը՝ ելույթները սկսելով այսօր՝ փետրվարի 6-ին:
24-րդ ձմեռային Օլիմպիական խաղերում Հայաստանի 6 ներկայացուցիչներից 5-ն արդեն Պեկինում են: Մրցավայր չի մեկնել միայն միակ լեռնադահուկորդ Հարություն Հարությունյանը՝ կորոնավիրուսի թեստի դրական պատասխանի պատճառով:
ArmSport-ի հետ զրույցում դահուկային սպորտի ֆեդերացիայի նախագահ Գագիկ Սարգսյանը հայտնում է, որ Հարությունյանն ամենայն հավանականությամբ կհասցնի մեկնել Պեկին:
«Հարությունյանը թեստավորվել է, բայց դեռ պատասխանը հայտնի չէ: Արդեն ապաքինվել է և գանգատներ չունի: Եթե թեստը բացասական եղավ, ապա Օլիմպիական կոմիտեի հետ կհասկանանք, թե ինչ կարող ենք անել: Կարծում եմ կհասցնի, քանի որ իր մեկնարկը փետրվարի 13-ին է: Այսինքն դեռ ժամանակ ունենք»,-ասում է Գագիկ Սարգսյանը:
Ֆեդերացիայի նախագահի խոսքով այս տարի առաջին անգամ Հայաստանը դահուկային սպորտում կարող էր ունենալ 4 մասնակցից ավելի, սակայն ընդհանուր հաշվարկում մի փոքր չբավարարեց 5-րդ ուղեգրի համար:
«Դահուկային մարզաձևերում գործընթացը երկար ու բարդ է: Օլիմպիական խաղերից Օլիմպիական խաղեր փորձում են անել փոփոխություններ՝ վարկանիշների, քվոտաների բաշխման հետ կապված: Օրինակ, վերջին փոփոխությունը, ցավոք, մեզ խանգարեց: Իհարկե, ունեցանք երեք վարկանիշ: Թադևոս Պողոսյանը գրեթե 3 անգամ բարձր վարկանիշ ունի երիտասարդ Անգելինա Մուրադյանից, բայց, քանի որ միջազգային ֆեդերացիան որդեգրել է կանանց սպորտը զարգացնելու քաղաքականություն, ստեղծվեց իրավիճակ, որ այդ ուղեգիրը հասնում էր Մուրադյանին:
2019 հուլիսից սկսվեց վարկանիշային մրցաշարերի հաշվարկը՝ տարեկան մոտ 12 աղյուսակ է հրապարակվում և այդպես մինչև Օլիմպիական խաղերին նախորդող վերջին երկու շաբաթը: Ըստ նոր կանոնադրության՝ ՕԽ-ում կանանց և տղամարդկանց մասնակցությունը պետք է լինի հավասար»,-ասում է Սարգսյանը և հավելում,- «Դահուկավազքի դեպքում կա ազգերի քվոտա, այսինքն որ տեղերում են ազգերը, իսկ լեռնադահուկի դեպքում դա չկա: Ստացվում էր այնպես, որ եթե ընդհանուր հաշվարկում մտնեինք լավագույն 30-ի մեջ, մենք կստանայինք ևս մեկ ուղեգիր, բայց ցավոք 31-րդն էինք»,-ասում է ֆեդերացիայի նախագահը:
Խոսելով Օլիմպիական խաղերում դահուկորդների սպասելիքների մասին՝ Սարգսյանը նշեց. «Մենք բնականաբար հեռու ենք մեդալային հաշավարկից: Իմ ամենամեծ ակնկալիքն ու սպասելիքը, հատկապես Միքայելից և Կատյայից է, որ պետք է ավելի լավ արդյունք ցույց տան, քան ցույց են տվել Փհենչանի Օլիմպիական խաղերում:
4 տարի մենք աշխատում ենք ուղեգրի համար, բայց մեր խնդիրը նաև այն է, որ մեր արդյունքները լավացնենք: Պեկինի խաղերից հետո հունիս ամսից պատրաստվելու ենք 2026-ի Օլիմպիական խաղերին»-ասում է Գագիկ Սարգսյանը:
Հիշեցնենք՝ փետրվարի 8-ին Կատյա Գալստյանը հանդես կգա արագավազքում (սպրինտ), իսկ փետրվարի 10-ին Գալստյանն ու Անգելինա Մուրադյանը պայքարի դուրս կգան 10 կմ դասական ոճում: 15 կմ դասական ոճում Միքայել Միքայելյանի մրցման օրը փետրվարի 15-ին է:
