Հունվարի 31-ին փակվեց ձմեռային տրանսֆերային պատուհանը։ Եվրոպական թոփ-5 լիգաների ակումբները ուղիղ մեկ ամիս հնարավորություն ունեին ձեռք բերելու ֆուտբոլիստներ իրենց կազմերի բացերը լրացնելու կամ ավելորդ ֆուտբոլիստներից ազատվելու համար։ Որոշ ակումբների դա հաջողվեց, իսկ ոմանց էլ՝ ոչ։ Այսպիսով, տրանսֆերային պատուհանը փակված է, իհարկե որոշ նորություններ դեռ առաջիկա օրերին ևս կլինեն, սակայն արդեն իսկ կարելի է ամփոփել եվրոպական տրանսֆերային անցուդարձը՝ կայացած տեղափոխությունների հիման վրա։
ArmSport-ը ձեզ է ներկայացնում իր վերլուծությունն ու դիտարկումները՝ ձմեռային տրանսֆերային պատուհանի վերաբերյալ:
💰 Ամենաշատ գումար ծախսած լիգաները
Տրանսֆերային պատուհանի ընթացքում ամենաշատ գումարը նոր ձեռքբերումների համար ծախսել են բնականաբար թոփ-5 առաջնությունների ակումբները։ Ամենաշռայլը ԱՊԼ-ի ներկայացուցիչներն են՝ 221 մլն եվրո։ Մի փոքր ավելի քիչ ծախսել են իտալական ակումբները՝ 214 մլն եվրո, որի մոտ կեսը բաժին է հասնում «Նապոլիին» և «Յուվենտուսին»։ Այդ երկու լիգաներին հաջորդում են Բունդեսլիգան՝ 200 մլն եվրո, իսպանական Լա Լիգան՝ 129,5 մլն, և լավագույն հնգյակը եզրափակում է ֆրանսիական Լիգա 1-ը՝ 121 մլն եվրո։ Ստացվում է, որ միայն թոփ-5 առաջնությունների ակումբները միասին ծախսել են 885,5 մլն եվրո այս ձմեռ։
💰 Նոր ձեռքբերումների համար ամենաշատ գումար ծախսած ակումբները
Բավականին անսպասելի էր տեսնել «Հերտային» և «Նապոլիին» նորեկների համար ամենաշատ գումար ծախսած ակումբների ցուցակի վերնամասում։ «Ծեր տիկինը» ամենաակտիվներից էր ձմեռային տրանսֆերային պատուհանի ընթացքում։ Պյոնտեկ, Կունյա, Ասկասիբար, Տուսար․ այս քառյակի համար «Հերտան» ընդհանուր առմամբ վճարել է 78 մլն եվրո, սակայն Լյուկա Տուսարը կմիանա գերմանական ակումբին միայն ամռանը։
Իտալական ակումբներից ամենաակտիվը «Նապոլին» էր, որը ընդհանուր առմամբ նորեկների համար ծախսել է 65,5 մլն եվրո (Լոբոտկա, Պետանյա, Դեմե և այլն), իսկ նեապոլիտանական ակումբին հաջորդում է «Մոնակոն», որը 60 մլն եվրո ներդրեց, կարելի է ասել, ապագայի համար՝ ձեռք բերելով երիտասարդ հեռանկարային ֆուտբոլիստների։ Ի՞նչ կստացվի այս ամենից, կտեսնենք առաջիկայում։
| 1 | 🇩🇪 Հերտա | 78 մլն եվրո |
| 2 | 🇮🇹 Նապոլի | 65,5 մլն* |
| 3 | 🇫🇷 Մոնակո | 60 մլն |
| 4 | 🏴 Մանչեսթեր Յունայթեդ | 55 մլն |
| 5 | 🇪🇸 Էսպանյոլ | 40,5 մլն |
| 6 | 🇫🇷 Լիոն | 38 մլն |
| 7 | 🇩🇪 Բայեր Լևերկուզեն | 35 մլն |
| 8 | 🇮🇹 Յուվենտուս | 35 մլն |
| 9 | 🇧🇷 Ֆլամենգո | 34,5 մլն |
| 10 | 🏴 Տոտենհեմ | 34,5 մլն |
*- բոլոր թվերը ներկայացված են եվրոյով
💰 Ֆուտբոլիստների վաճառքից ամենաշատ գումար վաստակած ակումբները
Ամենաշատը ֆուտբոլիստների վաճառքից գումար է վաստակել պորտուգալական «Սպորտինգը» (55 մլն եվրո), ավելի ճիշտ՝ մեկ ֆուտբոլիստի վաճառքից՝ Բրունո Ֆերնանդեշի, ում կանրադառնանք մի փոքր ուշ։ Ընդամենը 3 մլն եվրո պակաս է վաստակել Դորտմունդի «Բորուսիան», որը ոչ միայն ձեռք էր բերում այս ձմեռ, այլ նաև վաճառում (Ալկասեր, Վայգլ)։ Ի դեպ, ավստրիական «ՌԲ Զալցբուրգը» եզրափակում է այս ցուցակի լավագույն եռյակը՝ հենց գերմանական ակումբի շնորհիվ. խոսքը Հոլանդի տրանսֆերի մասին է։
| 1 | 🇵🇹 Սպորտինգ Լիսաբոն | 55 մլն |
| 2 | 🇩🇪 Բորուսիա Դորտմունդ | 52 մլն |
| 3 | 🇦🇹 ՌԲ Զալցբուրգ | 41,5 մլն |
| 4 | 🇮🇹 Ատալանտա | 37,5 մլն |
| 5 | 🇧🇷 Ֆլամենգո | 36 մլն |
| 6 | 🇮🇹 Վերոնա | 34 մլն |
| 7 | 🇮🇹 Միլան | 32,5 մլն |
| 8 | 🇧🇪 Գենկ | 32 մլն |
| 9 | 🇳🇱 ՊՍՎ | 32 մլն |
| 10 | 🇵🇹 Բենֆիկա | 29 մլն |
Ամենամեծ դրական բալանս ունեցող ակումբները․
| 1 | 🇵🇹 Սպորտինգ Լիսաբոն | 49 մլն |
| 2 | 🇩🇪 Բորուսիա Դորտմունդ | 31 մլն |
| 3 | 🇳🇱 ՊՍՎ | 31 մլն |
| 4 | 🇦🇹 ՌԲ Զալցբուրգ | 31 մլն |
| 5 | 🇮🇹 Միլան | 29 մլն |
| 6 | 🇧🇪 Գենկ | 27 մլն |
| 7 | 🇧🇷 Աթլետիկո Պարանայենսե | 25,8 մլն |
| 8 | 🇮🇹 Վերոնա | 25 մլն |
| 9 | 🇪🇸 Սելտա | 19,4 մլն |
| 10 | 🇬🇷 Օլիմպիակոս | 18,3 մլն |
💰 Ամենաթանկարժեք տրանսֆերները
Այս ձմեռային տրանսֆերային պատուհանի ընթացքում ամենաթանկարժեք տրանսֆերն իրականացրեց «Մանչեսթեր Յունայթեդը», որը 25-ամյա պորտուգալացի կիսապաշտպանի՝ Բրունո Ֆերնանդեշի տեղափոխության համար պորտուգալական «Սպորտինգին» կվճարի 55 մլն եվրո (գումարած 15-25 միլիոն բոնուսների տեսքով)։
Երկրորդ խոշոր տրանսֆերը իրականացրեց «Յուվենտուսը», որը ձեռք բերեց «Ատալանտայի» կիսապաշտպան Դեյան Կուլուսևսկիին։ 19-ամյա ֆուտբոլիստի տեղափոխության համար «Յուվենտուսը» 35 մլն եվրո է վճարել: Շվեդ խաղացողի տրանսֆերի գումարը կարող է աճել ևս 9 մլն եվրոյով՝ տարատեսակ բոնուսների հաշվին: Ընթացիկ մրցաշրջանի երկրորդ հատվածը ֆուտբոլիստը վարձակալությամբ կանցկացնի «Պարմայում», որի կազմում նույն հիմունքներով հանդես էր գալիս անցած ամառվանից:
Նախորդ շաբաթ «Ռեալը» պաշտոնապես հայտնել է «Ֆլամենգոյի» կիսապաշտպան Ռեյնիերին ձեռք բերելու մասին: 18-ամյա բրազիլացին «արքայական» ակումբի հետ մինչև 2026 թվականը պայմանագիր է ստորագրել: «Ռեալը» հեռանկարային ֆուտբոլիստի տրանսֆերի համար վճարել է 30 միլիոն եվրո:
Բավականին գրագետ տրանսֆերային քաղաքականություն վարեց «Ինտերը»․
«Տոտենհեմի» կիսապաշտպան Քրիստիան Էրիկսենը տեղափոխվեց Միլանի «Ինտեր»։ Դանիացու տրանսֆերի համար միլանյան ակումբը կվճարի 20 միլիոն եվրո:
Համաձայնվեք, որ շատ լավ տրանսֆեր է․ վճարել 20 մլն եվրո ֆուտբոլիստի համար, ում տրանսֆերային արժեքը գնահատվում է 90-100 մլն եվրո։ Իսկ Էշլի Յանգի տեղափոխությունը միլանյան ակումբը ՄՅՈւ-ի հետ համաձայնեցրել է 1.5 մլն եվրոյով: Մի խոսքով, Կոնտեն հիանալի աշխատանք կատարեց տրանսֆերային շուկայում։
Մրցաշրջանի գլխավոր հայտնություններից մեկը՝ Էրլինգ Հոլանդը, վերջապես տեղափոխվեց ավելի ուժեղ առաջնություն։ Գոհ է նաև Մինո Ռայոլան՝ հարձակվողի գործակալը, ով 15 մլն եվրո կստանա ֆուտբոլիստի՝ «Ռեդ Բուլ Զալցբուրգից» Դորտմունդի «Բորուսիա» տեղափոխության համար: Գերմանական ակումբը հարձակվողի համար ընդհանուր առմանբ 45 մլն եվրո կվճարի. 20 մլն եվրո կստանա ավստրիական ակումբը և ևս 10 մլն եվրո՝ նորվեգացի ֆուտբոլիստի հայրը:
«Հերտայի» մասին մենք արդեն խոսել ենք վերևում, իսկ ահա բավականին հետաքրքիր տրանսֆեր իրականացրեց անգլիական համեստ ակումբներից մեկը․
«Գենկի» կիսապաշտպան Սանդեր Բերգեն տեղափոխվեց «Շեֆիլդ Յունայթեդ»: Գործարքը կազմել է 21 միլիոն եվրո (գումարած 5 մլն բոնուսների տեսքով): Այսպիսով, անգլիական ակումբն իր պատմության մեջ ամենաթանկ տրանսֆերը կատարեց:
Ձեզ ենք ներկայացնում ձմեռային տրանսֆերային պատուհանի ընթացքում կատարված ամենաթանկարժեք գործարքները․
Նյութում առկա բոլոր գործարքներին վերաբերվող տեղեկությունները վերցված են Transfermarkt-ի պաշտոնական կայքից։
Վար Բաբայան
