Լեհաստանի Կրակով քաղաքում վերջերս ավարտվեց կիոկուշին կարատեի KWF աշխարհի առաջնությունը, որտեղ փայլուն ելույթներ ունեցան Հայաստանի հավաքականի անդամները. Մեր 10 պատվիրակներից 8-ը դարձան մեդալակիրներ՝ ընդհանուր առմամբ նվաճելով 3 ոսկե, 4 արծաթե և մեկ բրոնզե մեդալ:
Հայաստանի կիոկուշին կարատեի ազգային ֆեդերացիայի նախագահ Սպարտակ Գասպարյանն ArmSport-ի հետ զրույցում ամփոփել է Աշխարհի առաջնությունը, խոսել առաջիկա պլանների և այլնի մասին:
«Աշխարհի առաջնությունը կամփոփեմ մեկ բառով՝ գերազանց: Մեր 10 մասնակցից 8-ը դարձավ մեդալակիր, մրցաշարի լավագույն մարտիկի կոչմանը ևս արժանացավ մեր մարզիկը՝ Արթուր Առուշանյանը: Եթե անկեղծ՝ սպասում էի լավ արդյունքի, քանի որ օրուգիշեր պարապել ու աշխատել ենք:
Ո՞րն էր թիմի հաջողության գրավականը. գրագետ, ճիշտ աշխատանքը ու նաև հավատը սեփական ուժերին: Սա մեր ամբողջ թիմի՝ մազիչների, մարզիկների հաջողությունն է: Ու այստեղ մեծ է նաև մեր աջակցի՝ Արմեն Մուրադյանի դերը, ով այս ամիսների ընթացքում մեր կողքին է եղել: Նա պատրաստվում է խրախուսել չեմպիոններին, ինչը լրացուցիչ մոտիվացիա և ստիմուլ է տալիս, որպեսզի նրանք շարունակեն քրտնաջան աշխատել ու էլ ավելի լավ արդյունքների հասնել»:
Սպարտակ Գասպարյանը, խոսելով Աշխարհի քառակի չեմպիոն հռչակված արցախցի Արթուր Առուշանյանի մասին, նշում է՝ նրա հերթական նվաճումն իրեն չի զարմացրել.
«Արթուրը մեկ անգամ չէ, որ աշխարհի մակարդակով ապացուցել է իր բարձր կարգը, այնպես որ այս չեմպիոնությունն էլ միանգամայն սպասելի էր: Ինչ վերաբերում է մեր մյուս մեդալակիրներին, ապա բոլորն էլ արել են հնարավոր և անհնարին ամեն բան: Շնորհավորում եմ մեր բոլոր տղաներին: Երկու բան էի միշտ ասում՝ հավատացե՛ք ինքներդ ձեզ և հաճույք ստացե՛ք ձեր վարած մենամարտից»:
Ֆեդերացիայի նախագահի խոսքով՝ ԱԱ-ում մրցակցությունն իսկապես շատ թեժ է եղել.
«Ինչի՞ շնորհիվ կարողացանք հաջողության հասնել. կարծում եմ՝ մեծ ցանկության: Այսօր մեր երկրում այնպիսի իրավիճակ է տիրում, որ այս բարդ պայմաններում նման հաղթանակները կրկնակի կարևոր են դառնում: Հաղթանակի հասնելու ցանկությունը շատ մեծ էր. անհամեստ թող չթվա, բայց մենք շատ արժանի էինք այս հաղթանակներին, քանի որ շատ էինք տանջվել այս օրվա համար:
Մրցակցությունն իսկապես շատ թեժ էր, քանի որ երկրների մեծ մասը երկու տարի շարունակ ոչ մի մրցաշարի չէր մասնակցել ու պատկերացրեք՝ ինչպիսի մեծ ծարավով էին եկել և պայքարում էին միայն մեդալների համար»:
Ի դեպ, ֆեդերացիայի նախագահ Սպարտակ Գասպարյանն ու հավաքականի տղաներից երկուսը դեռևս չեն վերադարձել Լեհաստանից, քանի որ վերադարձին երկու մարզիկների կորոնավիրուսի թեստի պատասխանը դրական է եղել ու Հայաստանի ներկայացուցիչները ստիպված կլինեն 14-օրյա մեկուսացման մեջ լինել Վարշավայում.
«Տղաներն իրենց շատ լավ են զգում, որևէ ախտանշան չունեն, բայց ստիպված էինք հետաձգել վերադարձը: Դեկտեմբերի 4-ին պետք է կայանար Հայաստանի առաջնությունը, բայց փաստորեն չենք հասցնի այն անցկացնել»,- ասում է Սպարտակ Գասպարյանը:
Նրա խոսքով, հաջորդ տարի՝ ապրիլին, իրենք Հայաստանում միջազգային խոշոր մրցաշար կանցկացնեն, իսկ մայիսին Ուկրաինայում կմասնակցեն Եվրոպայի առաջնությանը.
«Մինչև տարվա վերջ էլ մի շարք միջազգային մրցաշարերի կմասնակցենք, ինչպես նաև տեղում Հայաստանի և մարզային առաջնություններ կկազմակերպենք: Իսկապես շատ բուռն տարի է լինելու ու ավելի ծանրաբեռնված ենք աշխատելու»,- եզրափակում է իր խոսքը Սպարտակ Գասպարյանը:
Հիշեցնենք՝ Աշխարհի առաջնութան տարբեր տարիքային խմբերում առաջին տեղը գրավել էին Արթուր Առուշանյանը, Դավիթ Ասատրյանը, Գոռ Մատոյանը։ Արծաթե մեդալների էին արժանացել Էմիլ Ղազարյանը, Հարություն Միրզոյանը, Արտյոմ Մնացականյանը և Մարտին Քոչարյանը, իսկ մրցանակային երրորդ տեղը զբաղեցրել էր Արեն Կարապետյանը։
Արթուր Առուշանյանը ճանաչվել էր նաև աշխարհի առաջնության լավագույն մարզիկ։
Պատերազմից հետո ուզում էի ավարտել կարիերաս. Աշխարհի քառակի չեմպիոն Արթուր Առուշանյան
