«Արմենիա» հեռուստաընկերությունը բացառիկ իրավունքով կցուցադրի հունիսի 11-ին մեկնարկող Եվրոպայի առաջնության բոլոր 51 հանդիպումները․ մեկ ամիս շարունակ հայ երկրպագուներն ուղիղ հեռարձակմամբ կկարողանան վայելել ամառվա ամենասպասված ֆուտբոլային խաղերը։
Իսկ նախքան Եվրոյի մեկնարկը «Արմենիա TV»-ն ֆուտբոլային լավագույն գիտակներին փնտրելու ակնկալիքով մայիսի 17-ից հայտարարել է մրցույթ՝ խթանելով երկրպագուների ֆուտբոլային գիտելիքների ամրապնդումը, նրանց մասնակիցը դարձնելով եվրոպական ֆուտբոլային տոնին՝ միևնույն ժամանակ հնարավորություն ընձեռելով շահելու արժեքավոր նվերներ։
Ֆուտբոլային մեկնաբան Էդուարդ Քալանթարյանն ArmSport-ի հետ զրույցում պատմել է մրցույթի մանրամասների, Եվրոպայի առաջնությունից ունեցած սպասելիքների և այլնի մասին․
«Արմենիա TV»-ն երկրպագուներին նախ բացառիկ հնարավորություն է ընձեռում հետևելու Եվրոպայի առաջնության բոլոր հանդիպումներին՝ ուղիղ եթերում։ Բացի բուն հանդիպումները կունենանք նաև օրական երկու հաղորդում՝ մինչև խաղերի մեկնարկը և խաղերից հետո, որոնց ընթացքում տարբեր հյուրերի և փորձագետների հետ քննարկումներ կանցկացնենք։
Բացի սա, կազմակերպել ենք նաև երկու մրցույթ՝ նպատակ ունենալով այնպես անել, որ երկրպագուներն ավելի շատ գիտելիքներ ունենան ու նաև հնարավորություն ունենան ինչ-որ մրցանակ շահելու»,- ասում է Էդուարդ Քալանթարյանն ու ընդգծում, որ Ֆեյսբուք սոցիալական ցանցում կազմակերպված մրցույթն ավելի ինտելեկտուալ բնույթ է կրում։
«Հաղթիր Եվրոյի հետ» խորագիրը կրող մրցույթում Արմենիա TV-ի ֆեյսբուքյան էջում 20 օր շարունակ տեղադրվելու է օրական մեկ հարց, երկրպագուները մեկնաբանություններում նշելու են իրենց պատասխանները, իսկ ճիշտ պատասխանի դեպքում ստանալու են միավորներ։ Ամեն հաջորդ օրվա հարցը լինելու է ավելի բարդ և գնահատվելու է ավելի բարձր միավորով։
Հարցը տեղադրվում է կեսօրին՝ 13։00-ին, իսկ ամփոփվում է հաջորդ օրվա առավոտյան 10։00-ին։ Մրցույթի առաջին փուլի հաղթող կդառնան առավելագույն միավոր վաստակած 10 մասնակիցները: Առաջին փուլի արդյունքները կամփոփվեն հունիսի 6-ին։ Եթե 10-րդ հորիզոնականը բաժանի մի քանի մասնակից, ապա փուլի հաղթողների թիվը կավելանա:
Առաջին փուլի բոլոր հաղթողները կստանան նվերներ՝ «Նյումեգ» հրատարակչության համաշխարհային ֆուտբոլի աստղերի մասին բեսթսելլերներ՝ հայերեն թարգմանությամբ։ Առաջին փուլի հաղթողները հունիսի 10-ին կհրավիրվեն «Արմենիա» TV, որտեղ կկայանա մրցույթի եզրափակիչը: «Արմենիա» TV-ի ֆեյսբուքյան ուղիղ եթերում մասնակիցները կպատասխանեն Էդուարդ Քալանթարյանի հարցերին:
«Այստեղ արդեն ինտերնետից օգտվելու հնարավորություն չի լինի ու մասնակիցները միավորները կվաստակեն բացառապես իրենց գիտելիքների շնորհիվ»,- ընդգծում է Էդուարդ Քալանթարյանը։
Եզրափակչի յուրաքանչյուր մասնակցի կտրվի 5-ական բլից հարց: Տվյալ շրջանում ամենաքիչ ճիշտ պատասխան տվողները դուրս կմնան պայքարից: Մյուսները դուրս կգան հաջորդ փուլ: Վերջին շրջանում ամենաշատ ճիշտ պատասխան տված մասնակիցը կճանաչվի մրցույթի հաղթող և կստանա գլխավոր մրցանակը՝ PlayStation 5 խաղային համակարգ։
Էդուարդ Քալանթարյանի խոսքով, արդեն իսկ բավականին մեծ ակտիվություն կա ֆուտբոլասերների կողմից․
«Առաջին իսկ օրվանից ակտիվություն նկատվում է։ Հարցերն ուղղում են շոու-բիզնեսի հայտնի դեմքերը, մարզական մեկնաբանները և դրանք տեսահարցեր են, ինչն ավելի հետաքրքիր է դարձնում մրցույթը։ Հիմա նկատում ենք, որ այո, մեծ ակտիվություն կա։ Բոլորը ցանկանում են ոչ միայն պատասխանել տվյալ հարցին, այլև հնարավորինս շուտ պատասխանել, որպեսզի կարողանան միավոր ստանալ, քանի որ միավորները ստանում են ամենաարագ պատասխանողները»,- ընդգծում է Էդուարդ Քալանթարյանը։
Միավորները բաշխվելու են հետևյալ կերպ՝
1-ին օրը ճիշտ պատասխան գրած առաջին 40 օգտատերերը ստանում են 1-ական միավոր
2-րդ օրը ճիշտ պատասխան գրած առաջին 38 օգտատերերը ստանում են 2-ական միավոր
3-րդ օրը ճիշտ պատասխան գրած առաջին 36 օգտատերերը ստանում են 3-ական միավոր և այդպես շարունակ։
20-րդ օրը՝ ճիշտ պատասխանած առաջին 2 օգտատերերը կստանան 20-ական միավոր։
Արմենիա TV-ն եվս մեկ՝ արդեն ֆոտոմրցույթ, անցկացնում է Instagram-ում՝ «Դարձիր լավագույն երկրպագուն» խորագրով։
Անհրաժեշտ է Instagram-ում հրապարակել ֆուտբոլային մթնոլորտով լուսանկար՝ ցույց տալով, թե ինչպես եք երկրպագում Եվրոյի մասնակից ձեր սիրելի հավաքականին։
«Լուսանկարում կարող եք լինել Ձեր ընտանիքի անդամների, ընկերների հետ կամ էլ՝ միայնակ։ Կարևորը՝ լինի գեղեցիկ, ֆուտբոլային ֆանատի լուսանկար։ Ամենաշատ հավանում ստացած լուսանկարը կճանաչվի հաղթող, իսկ դրա հեղինակը կստանա իր երկրպագած հավաքականի օրիգինալ մարզաշապիկը»,- ասում է Էդուարդ Քալանթարյանը։
View this post on Instagram
Էդուարդ Քալանթարյանի խոսքով, այլ մրցույթներ, ամենայն հավանականությամբ, չեն անցկացվի․
«Եվրոպայի առաջնության ծրագիրն այնքան հագեցած է, որ չենք հասցնի այդ ընթացքում ուրիշ բան կազմակերպել։ Օր կա՝ հիմնականում խմբային փուլում, 3-4 խաղ է լինելու։ Այնպես որ, լավագույն ֆուտբոլ մատուցելուց բացի, դժվար, թե կարողանանք ուրիշ բանով ուրախացնել երկրպագուներին։
Իսկ մրցաշարից առաջ կարծում եմ՝ այս երկու մրցույթով բավականին լուրջ աժիոտաժ ստեղծում ենք և երկրպագուներն ավելի մոտ կլինեն Եվրոպայի առաջնությանը»,- նշում է Էդուարդ Քալանթարյանը։
Եվրոպայի առաջնության հանդիպումները, բացի Էդուարդ Քալանթարյանից, մեկնաբանելու են նաև Խաչիկ Չախոյանը, Էռնեստ Շաբոյանն ու Ռոբերտ Գասպարյանը։ Եթե նույն ժամին երկու խաղ է նշանակված, դրանցից մեկը կլինի Արմենիա TV-ի, իսկ մյուսը՝ Արմենիա Premium-ի եթերում։ Եթե մեկ խաղ է, կհեռարձակվի թե՛ Արմենիա TV-ի և թե՛ Արմենիա Premium-ի ուղիղ եթերում։
Քալանթարյանի խոսքով, ինքը շատ արտասովոր առաջնություն է ակնկալում․
«Շատ արտասովոր առաջնություն եմ ակնկալում, քանի որ առաջին անգամ Եվրոպայի առաջնությունը կանցկացվի այսպիսի բարդ պայմաններում, երբ երկրպագուների մուտքը սահմանափակ է։ Իհարկե, որոշ քաղաքներ արդեն երաշխավորել են, որ լեփ-լեցուն տրիբունաներ կլինեն, դա շատ լավ է, քանի որ խոշոր մրցաշարն առանց երկրպագուների այն չէ։
Մեզ՝ մեկնաբաններիս համար էլ հետաքրքիր է, երբ կա ֆուտբոլային մթնոլորտ։ Ինչ վերաբերում է բուն մրցաշարին, ապա հավաքականներն աստիճանաբար իրենց վերջնական հայտացուցակները ներկայացնում են, ու մենք տեսնում ենք, թե ինչ հզոր կազմերով են մասնակցելու Եվրո-ին։ Կան մի քանի հավաքականներ, որոնք բնականաբար ֆավորիտ են, բայց անձամբ ես շատ մեծ սպասելիքներ ունեմ Բելգիայի հավաքականից։ Կարծում եմ՝ հասունացել է պահը, որ նրանք պետք է ինչ-որ տիտղոս նվաճեն։
Ինչ վերաբերում է մեկնաբանությանը, ապա որքան էլ փորձ ունեմ ու կարելի է ասել՝ մեկնաբանության մեջ ամեն ինչ տեսել եմ, միևնույն է՝ շատ մեծ անհանգստությամբ եմ սպասում, կարծես առաջին անգամ պետք է որևէ խոշոր մրցաշար մեկնաբանեմ, լուսաբանեմ։ Երիտասարդական ավյունը կա, բոլորս անհամբերությամբ ենք սպասում Եվրոպայի առաջնությանը»,- ընդգծում է Էդուարդ Քալանթարյանը։
Հիշեցնենք՝ կորոնավիրուսի համավարակի պատճառով Եվրոպայի առաջնությունը, որը պետք է կայանար 2020 թվականին, հետաձգվեց ու կանցկացվի այս տարի։ Եվրոպայի առաջնության 60-ամյակի կապակցությամբ մրցաշարը կանցկացվի 11 քաղաքներում` Լոնդոնում, Մյունխենում, Սանկտ-Պետերբուրգում, Սևիլիայում, Բաքվում, Հռոմում, Բուխարեստում, Կոպենհագենում, Գլազգոյում, Բուդապեշտում և Ամստերդամում:
