Գահերի խաղը․ Արիստոկրատներն ընդդեմ արքաների

Այսօր կմեկնարկի Չեմպիոնների Լիգայի 2020/21 մրցաշրջանի կիսաեզրափակիչ փուլը։ Եվ առաջին հանդիպումը կկայանա Մադրիդում, և որքան էլ որ հեգնական է, բայց առաջին խաղում միմյանց կհանդիպեն «էլիտար» ակումբները․ «Արքայական ակումբն» ու «Արիստոկրատները»՝ «Ռեալն» ընդդեմ «Չելսիի»։

Հատկանշական է, որ մինչ կիսաեզրափակիչ փուլ հասնելը «Ռեալը» հետագա պայքարից դուրս է թողել անգլիական մեկ այլ ակումբի՝ «Լիվերպուլին», իսկ «Չելսին»՝ իսպանական «Աթլետիկոյին»։ Երկու ակումբներն էլ, ի տարբերություն մյուս զույգի ներկայացուցիչների («Մանչեսթեր Սիթի»-ՊՍԺ), եվրագավաթային հարուստ փորձ ունեն, երկու ակումբներն էլ դարձել են Չեմպիոնների Լիգայի հաղթող, չնայած այդ առումով «Չելսին» դեռ շատ հեռու է «Ռեալի» ցուցանիշից․ մադրիդյան ակումբն այդ առումով ընդհանրապես ամենատիտղոսակիրն է։

⚔ Պատմություն

Նախամրցաշրջանային մրցաշարերում անցկացրած երկու հանդիպումները չհաշված, Մադրիդի «Ռեալն» ու «Չելսին» երեք անգամ են խաղացել: Եվ բոլոր դեպքերում նրանք հանդիպել են տիտղոսի համար պայքարում:

1971 թվականին թիմերը հանդիպեցին գավաթակիրների գավաթի եզրափակչում: Եզրափակիչը բաղկացած էր երկու հանդիպումներից: Առաջին հանդիպումը, որը կայացավ Աթենքում, ավարտվեց ոչ-ոքի ՝ 1-1: Բայց ընդամենը երեք օր անց «Չելսին» հաղթեց 2-0 հաշվով և նվաճեց իր առաջին գավաթը եվրոպական ասպարեզում:

1998 թվականին «Լուի II» մարզադաշտում «Չելսին» ու «Ռեալը» միմյանց հետ խաղում էին ՈՒԵՖԱ-ի Սուպերգավաթի համար․ 83-րդ րոպեին «արիստոկրատների» հաղթանակն ապահովեց Գուստավո Պոյեն՝ խփելով այդ խաղում միակ գոլը: Այսպիսով երեք պաշտոնական խաղ, 2 հաղթանակ հօգուտ լոնդոնցիների, մեկ ոչ-ոքի։ Միգուցե «Ռեալն» այսօր կբարելավի՞ վիճակագրությունը «Չելսիի» հետ պաշտոնական խաղերում։

🇪🇸 Ռեալ

Ինչպես և «Չելսին», «Ռեալը» ներքին առաջնությունում շատ դժվար փուլ է անցնում․ թիմը պայքարում է չեմպիոնության համար, աղյուսակի վերնամասում շատ թեժ է, և Զիդանի թիմը փորձում է հավասարապես հաջող պայքար մղել երկու ճակատով։ Եվ դա «արքայական ակումբի» մոտ մինչ այժմ բավականին լավ էլ ստացվում է։ Մյուս կողմից Սուպերլիգայի հետ կապված իրավիճակը, թիմի նախագահ Պերեսի նկատմամբ ոչ դրական տրամադրվածությունը ֆուտբոլային հանրության կողմից կարող է լրացուցիչ, բացասական ճնշում հանդիսանալ թիմի համար, բայց ինչպես Զիդանն էր նշել հարցազրույցներից մեկի ժամանակ, դա բոլորվին չի ազդում ֆուտբոլիստների տրամադրվածության վրա, և իրենք պարզապես կփորձեն խաղադաշտում իրենց գործն անել։

Ինչ վերաբերվում է այսօրվա խաղին, ապա իր նախկին թիմի դեմ կարող է խաղալ Էդեն Ազարը, ով «Չելսիի» հետ կապված շատ դրական հիշողություններ ունի, նա լավագույններից մեկն էր աշխարհում լոնդոնյան ակումբում հանդես գալու տարիներին։ Իսկ ահա «Ռեալի» ավագը՝ Ռամոսը, բաց կթողնի այսօրվա խաղը, ինչ իսկապես մեծ կորուստ է մադրիդցիների համար։ Բացի իսպանացուց, այսօրվա հանդիպումը բաց կթողնեն նաև Մենդին, Վասկեսը և Վալվերդեն (թիմի հայտացուցակն այօրվա խաղի համար՝ այստեղ)։

🏴󠁧󠁢󠁥󠁮󠁧󠁿 Չելսի

Ի տարբերություն «Ռեալի», «Չելսին» արդեն դուրս է մնացել ԱՊԼ-ի չեմպիոնական մրցավազքից, սակայն պայքարում է լավագույն քառյակում իր տեղը ապահովելու համար, որը հնարավորություն կտա Տուխելի թիմին հաջորդ մրցաշրջանում ևս մասնակցել ՉԼ-ին։ Այնպես որ, Տուխելի թիմը ևս պայքարում է երկու ճակատով։ Հետաքրքիր է, որ 9 տարի առաջ, «Չելսին» մրցաշրջանի ընթացքում ևս փոխել էր գլխավոր մարզչին և հաղթել ՉԼ-ն։ Կարծես թե պատմությունը կրկնվում է, և Տուխելը, ով ստանձնել է թիմն այս մրցաշրջանի կեսերից, ևս կարող է կրկնել այդ սխրանքը։ Սակայն, առանց այդ էլ «Չելսին» արդեն մեծ սխրանք է գործել՝ հասնելով կիսաեզրափակիչ․ նոր մարզիչ, նոր թիմ, որի հիմնական կազմի մոտ կեսը թարմացվել է այս մրցաշրջանում։ Հեշտ չէ այդպիսի կտրուկ փոփոխություններից հետո այդքան առաջ գնալ, կրկնվեմ՝ հորիզոնում ունենալով պայաքար երկու ճակատով։ Նշենք, որ «Չելսին» ևս կորստով է մոտենում այսօրվա հանդիպմանը․ կիսապաշտպան Մատեո Կովաչիչը չի օգնի լոնդոնյան ակումբին Չեմպիոնների լիգայի կիսաեզրափակչի՝ «Ռեալի» դեմ խաղում:

Չեմպիոնների լիգայի կիսաեզրափակչի՝ «Ռեալ»-«Չելսի» առաջին հանդիպումը կկայանա այսօր՝ ապրիլի 27-ին, Իսպանիայի մայրաքաղաքում։ Հանդիպումը կմեկնարկի Երևանի ժամանակով 23։00-ին։ Թիմերի միջև պատասխան խաղը նախատեսված է մայիսի 5-ին։

Հայտնի է, թե ովքեր են սպասարկելու Չեմպիոնների լիգայի կիսաեզրափակչի առաջին հանդիպումները․Մադրիդի «Ռեալ» – «Չելսի» (ապրիլի 27). Գլխավոր՝ Դենի Մաքքելի, օգնականներ ՝ Հեսել Ստեգստրա և Յան դե Վրիս, պահեստային ՝ Օրել Գրինֆելդ, VAR ՝ Քեվին Բլոմ, VAR օգնական ՝ Կամֆուիս Յոխեմ:

Վար Բաբայան