Ապրիլի 4-ին Հայաստանի Կիոկուշին կարատեի ֆեդերացիան անցկացնելու է Հայաստանի Գավաթի մրցաշար, որը նվիրված է լինելու ֆեդերացիայի 3 մարզիկներին՝ Արթուր Սուքիասյանին, Ազատ Ալոյանին ու Հայկ Կիրակոսյանին, որոնք անմահացան Արցախյան երկրորդ պատերազմում։ Այս մասին ArmSport-ի հետ զրույցում ասաց ֆեդերացիայի նախագահ Անդրանիկ Հակոբյանը։ Մրցաշարն անցկացվելու է նախկին «Միկա» մարզահամալիրում։
«Արթուր Սուքիասյանը և մյուս տղաները սև գոտիներ էին ստացել, որոնք արտասահմանից են գալիս։ Հարմար առիթի էինք սպասում՝ դրանք նրանց շնորհելու համար։ Ցավոք, այդ առիթը չեղավ և այդ օրը մենք սև գոտիները կփոխանցենք նրանց ծնողներին։ Այդ տղաների քրտինքը։ Նրանք մոտ 12 տարի մարզվել են, որ հասնեն այդ նպատակին»,- ասաց Հակոբյանը։
Հակոբյանն ասում է, որ Կիոկուշին կարատեն Հայաստանում, կարելի է ասել, ամենազարգացած մարզաձևն է, իսկ այս ֆեդերացիան Հայաստանում ամենամեծն է համարվում․ մեծ թվով մարզիկներ են պարապում։
«Մենք մեծ առավելություններ ունենք․ մեր մարզիկներին անվճար ուղարկում ենք արտասահմանյան մրցումների։ 2017 թվականին ֆեդերացիան պետության կողմից ճանաչում ստացավ։ Արևելյան ոճի միակ կոնտակտային մարզաձևի ֆեդերացիան է, որը ճանաչվեց պետության կողմից»,- մանրամասնեց ֆեդերացիայի նախագահը։
Խոսելով խնդիրների մասին, որոնք պիտի լուծում ստանան՝ Հակոբյանն ասաց․
«Քանի որ կորոնավիրուսի պատճառով ֆեդերացիան ստաբիլ չի աշխատել գրեթե մեկ տարի, այս պահի դրությամբ մեր առաջնային խնդիրը նախկին իրավիճակի վերականգնումն է։ Պիտի կամաց-կամաց մրցաշարեր կազմակերպենք ու այն մրցաշարերը, որ բաց ենք թողել, փորձելու ենք լրացնել։ Միանշանակ, տարվա երկրորդ կեսից կմասնակցենք Եվրոպայի ու Աշխարհի առաջնություններին»։
Ստելլա Բաբլոյան
