2020-ի նոյեմբերի 3-ին «Գանձասար-Կապանը» հայտարարեց ելույթները ժամանակավորապես դադարեցնելու մասին: Սրան նախորդել էր ՀՖՖ այն հայտարարությունը, թե «Գանձասար-Կապան»-«Վան» հանդիպումից հետո «Գանձասար-Կապան» ակումբի ներկայացուցիչների կողմից ծեծի են ենթարկվել հանդիպման մրցավարը և ՀՖՖ տեսուչներից մեկը: ՀՖՖ-ն այս առիթով ներքին քննություն էր սկսել:
Կապանյան ակումբի դարպասապահ Գրիգոր Մելիքսեթյանը ArmSport-ի հետ զրույցում ասում է, որ ելույթները դադարեցնելու վերաբերյալ որոշումը ակումբի ղեկավարությունը քննարկել է ֆուտբոլիստների հետ.
«Այդ պահին դա է եղել ճիշտ որոշումը: Պատճառը՝ առաջնայինը պատերազմական վիճակը»:
Մելիքսեթյանը թիմի հետ պայմանագիրը խզել է վերոնշյալ հայտարարությունից երկու ամիս անց միայն, որովհետև «առաջնությունը դեռ ընթացքի մեջ էր, պետք է վերջանար, ապա ֆուտբոլիստները սկսեին նոր թիմ փնտրել»:
Փորձառու դարպասապահը թիմում անցկացրել է 6 տարի: Ասում է, որ այդ ընթացքում շատ լավ պահեր է ունեցել.
«Եղել են նաև վայրէջքներ, բայց նույնիսկ շատ դժվար պահերին «Գանձասարը» պայքարել է հաղթանակի համար՝ անկախ ամեն ինչից»:
Մելիքսեթյանի խոսքով՝ ակումբի ղեկավարությունը միշտ էլ ֆուտբոլիստների համար արել է այն, ինչ խոստացել է:
«Ես երբեք չէի հեռանա «Գանձասարից», եթե թիմը չդադարեցներ ելույթները, կամ, եթե ինձ չհեռացնեին թիմից (ծիծաղում է)»,-ասում է դարպասապահն ու չի բացառում, որ թիմը հնարավոր է՝ մի օր վերսկսի ելույթները:
Հիշեցնենք, որ նոյեմբերի 6-ին ՀՖՖ Կարգապահական և էթիկայի կոմիտեի ժամանակ որոշվել էր «Գանձասար-Կապան» թիմին հեռացնել VBET Հայաստանի Պրեմիեր լիգայի առաջնությունից, ՀՖՖ հովանու ներքո անցկացվող բոլոր մրցումների խաղերին մասնակցելու իրավունքից զրկել՝ հաջորդ մրցաշրջանում միայն Առաջին խմբի առաջնությունում հանդես գալու հնարավորությամբ:
Հարազատ ակումբից հեռանալուց հետո Գրիգոր Մելիքսեթյանը ցանկություն է հայտնել միանալ «Արարատին», ասում է՝ ղեկավարությունն ու մարզչական շտաբը սիրով են ընդունել իրեն.
««Արարատը» լավ թիմ է՝ բարձր նպատակներով, լավ ֆուտբոլիստներ կան՝ փորձառու ու երիտասարդ, կարծում եմ՝ ճիշտ ուղու վրա ենք»:
Մելիքսեթյանի վերադարձն ազգային հավաքական կայացավ, որովհետև հրավիրված դարպասապահները հիվանդացել էին.
«Ճիշտն ասած, կազմն արդեն հրապարակվել էր, ես հրավիրվածների ցուցակում չկայի, հետո դարպասապահները վարակվեցին, և ես միացա հավաքականին, հետո ես ևս վարակվեցի կորոնավիրուսով»:
Տարվա հիվանդության առաջին 5 օրը դարպասապահի համար դժվար է եղել, հետո արդեն կամաց-կամաց դեպի լավը գնացել, ապա ամեն ինչ անցել է. «այդ հիվանդությունն արդեն անցյալում է»:
Հիշեցնենք, որ VBET Հայաստանի Պրեմիեր լիգայի ձմեռային հատվածից հետո Երևանի «Արարատը» գլխավորում է մրցաշարային աղյուսակը, իսկ գարնանային հատվածի վերսկսումը նախատեսված է փետրվարի 19-21-ն ընկած ժամանակահատվածում:
Ստելլա Բաբլոյան
