Սեպտեմբերի 3-ին մեկնարկեց Ազգերի լիգայի թվով արդեն երկրորդ խաղարկությունը։ Արդեն ավարտվել է մրցաշարի առաջին տուրը և առաջարկում ենք ծանոթանալ մրցաշարի մեկնարկային տուրի հանդիպումների արդյունքներին և տեղի ունեցած կարևորագույն իրադարձություններին։
Թե ի՞նչ մրցաշար է Ազգերի լիգան և ինչպե՞ս է այն գործում, կարող եք ծանոթանալ այստեղ։
⚽ A լիգա
✅ 1-ին խումբ
Իտալիայի հավաքականը սեփական հարկի տակ ընդունեց Բոսնիա և Հերցեգովինայի ընտրանուն։ Առաջին խաղակեսն ավարտվեց առանց դարպասի գրավումների: Երկրորդ խաղակեսի 58-րդ րոպեին Էդին Ջեկոն հաշվի մեջ առաջ մղեց հյուրերին։ Տասը րոպե անց, Իտալիայի հավաքականի կիսապաշտպան Ստեֆանո Սենսին հավասարեցրեց հանդիպման հաշիվը: Հանդիպումն այդպես էլ ավարտվեց՝ ոչ-ոքի՝ 1-1։
Խմբի մյուս խաղում, Նիդերլանդների հավաքականը հաղթեց Լեհաստանի ընտրանուն (1-0): Հանդիպման առաջին խաղակեսը անցավ համառ պայքարում, սակայն, թիմերն այդպես էլ չկարողացան գրավել միմյանց դարպասները: Խաղի 61-րդ րոպեին տանտերերը ՝ Սթիվեն Բերգվեյնի գոլի շնորհիվ կարողացան հաղթանակ տոնել լեհերի նկատմամբ:
✅ 2-րդ խումբ
Անգլիայի ընտրանին հյուընկալվելիս նվազագույն հաշվով հաղթեց Իսլանդիայի թիմին: Հյուրերը հաղթական գոլը խփեցին 90-րդ րոպեին: Գոլի հեղինակ դարձավ Ստերլինգը: Երկու րոպե անց 11 մետրանոցի իրավունք ստացան նաև տանտերերը, սակայն Բյարնասոնը չկարողացավ անվրեպ իրացնել այն:
Իսկ Բելգիան իր հերթին արտագնա հաղթանակ տարավ Դանիայի ընտրանու նկատմամբ։ Բելգիացիները երկու անպատասխան գնդակ ուղարկեցին Կասպեր Շմեյխելի դարպասը․ աչքի ընկան Մերտենսն ու Դենայերը։
✅ 3-րդ խումբ
Պորտուգալիայի հավաքականը սեփական հարկի տակ ընդունել էր Խորվաթիայի ընտրանուն։ Պորտուգալացիները կարողացան վստահ հաղթանակի հասնել աշխարհի փոխչեմպիոնների դեմ խաղում։ Խաղի հաշիվը 41-րդ րոպեին բացեց Ժոաու Կանսելուն։ Երկրորդ կեսի մեկնարկում Դիոգու Ժոտան կրկնապատկեց Ֆերնանդու Սանտուշի գլխավորած թիմի առավելությունը։ 70-րդ րոպեին հաշիվը խոշոր դարձրեց Ժոաու Ֆելիշը՝ 3-0։ Մրցավարի ավելացրած ժամանակում հյուրերը կարողացան մեկ գնդակ հետ բերել։ Աչքի ընկավ Բրունո Պետկովիչը։ Սակայն սա ևս վերջը չէր։ Մրցավարի ավելացրած ժամանակի 5-րդ րոպեին խաղի վերջնական հաշիվը ձևակերպեց Անդրե Սիլվան՝ 4-1։
Ի դեպ, Պորտուգալիայի հավաքականի ավագ Կրիշտիանու Ռոնալդուն մեղվի խայթոցի պատճառով բաց թողեց Ազգերի լիգայի՝ Խորվաթիայի ազգային հավաքականի հետ հանդիպումը։
Խմբի մյուս խաղում միմյանց դեմ մրցեցին Շվեդիան ու Ֆրանսիան։ Աշխարհի չեմպիոնները կարողացան նվազագույն հաշվով առավելության հասնել։ Հանդիպման միակ գնդակը 41-րդ րոպեին խփեց Կիլիան Մբապեն։
Հանդիպման ավելացված 5-րդ րոպեին Անտուան Գրիզմանը չկարողացավ իրացնել 11-մետրանոց հարվածը: Հարձակվողի հարվածից հետո գնդակն անցավ դարպասաձողի վրայով: Այսպիսով, Գրիզմանը դարձավ Ֆրանսիայի հավաքականի առաջին ֆուտբոլիստը, ով 3 խաղում անընդմեջ վրիպել է 11-մետրանոցից:
✅ 4-րդ խումբ
Ա լիգայի 4-րդ խմբում Գերմանիան ընդունեց Իսպանիային: Գերմանիան հանդես չեկավ մարտական կազմով, սակայն դա չխանգարեց «գերմանական մեքենային» միավոր վաստակելու հարցում: Առաջին գոլազուրկ խաղակեսից հետո, Գերմանիան, երկրորդ խաղակեսի 6-րդ րոպեին առաջ անցավ հաշվի մեջ. հաշիվը բացեց Տիմո Վերները: Երբ թվում էր, որ խաղը ավարտվելու է Լյովի թիմի հաղթանակով, 96-րդ րոպեին Գայան խփեց պատասխան գնդակն ու դրեց խաղի վերջակետը՝ 1-1։ Մյունխենի «Բավարիայից» Գերմանիայի հավաքականում ընդգրկված է միայն 2 ֆուտբոլիստ: Մնացածներին հանգստանալու հնարավորություն է տրվել:
Խմբի մյուս խաղում Ուկրաինայի հավաքականը սեփական դաշտում հյուրընկալել էր Շվեյցարիայի ընտրանուն։ Անդրեյ Շևչենկոյի սաները լավ սկսեցին խաղն ու 14-րդ րոպեին առաջ անցան հաշվի մեջ։ Տանտերերին առաջ մղեց Անդրեյ Յարմոլենկոն։ Մինչև ընդմիջման գնալը հաշիվը հավասարեցվեց։ Շվեյցարացիների կազմում աչքի ընկավ Հարիս Սեֆերովիչը՝ 1-1։ Երկրորդ կեսում Ուկրաինան ավելացրեց ճնշումը, ինչը տվեց ցանկալի արդյունքը։ 68-րդ րոպեին Ալեքսանդր Զինչենկոն գերազանց հարվածով առաջ մղեց իր թիմին։ Ինչպես հետագայում պարզվեց, սա խաղի հաղթական գոլն էր։ Ուկրաինան հաղթեց 2-1 հաշվով։ Այսպիսով, ուկրաինացիները առաջին 3 միավորն են վաստակում ու գլխավորում են 4-րդ խմբի մրցաշարային աղյուսակը:
Համառոտ անդրադառնանք նաև մյուս լիգաների հանդիպումներին։
⚽ B լիգա
1-ին խմբի խաղում Ավստրիայի հավաքականը արտագնա հաղթանակ տարավ Նորվեգիայի ընտրանու նկատմամբ 2-1 հաշվով։ Ի դեպ, Էրլինգ Հոլանդն իր առաջին գոլը խփեց Նորվեգիայի հավաքականի կազմում։
Խմբի մյուս խաղում Ռումինիան և Հյուսիսային Իռլանդիան չորոշեցին հաղթողին՝ 1-1։
2-րդ խմբում Սլովենիայի հավաքականը սեփական հարկի տակ 1-3 հաշվով զիջեց Չեխիայի ընտրանուն, իսկ Շոտլանդիան և Իսրայելը խաղացին ոչ-ոքի՝ 1-1։
3-րդ խումբ․ Ռուսաստանի հավաքականը վստահ հաղթանակ տարավ Սերբիայի ընտրանու նկատմամբ։ Ձյուբան այդ խաղում իր հաշվին դուբլ գրանցեց, ևս մեկ անգամ աչքի ընկավ Կարավաևը, իսկ սերբերից միակ գնդակը խփեց Միտրովիչը։
Մյուս խաղում Հունգարիան մեկ անպատասխան գնդակ ուղարկեց Թուրքիայի հավաքականի դարպասը՝ 1-0։
4-րդ խմբում Ուելսի հավաքականը նվազագույն հաշվով հաղթեց Ֆինլանդիային, իսկ Բուլղարիա-Իռլանդիա զույգում գրանցվեց ոչ-ոքի՝ 1-1։
⚽ C լիգա
1-ին խումբ․ Ադրբերջանի հավաքականը սեփական հարկի տակ 1:2 հաշվով պարտվեց Լյուքսեմբուրգի ընտրանուն: Կիպրոսը սեփական հարկի տակ 2 գոլ բաց թողեց Չեռնոգորիայից։
2-րդ խումբ․ Հայաստանի ազգային հավաքականը պարտությամբ մեկնարկեց Ազգերի լիգայի նոր մրցաշրջանում: Առաջին տուրում Խոակին Կապառոսի թիմը հյուրընկալվեց Հյուսիսային Մակեդոնիայի ընտրանուն և պարտվեց 1-2 հաշվով։ Բոլոր գոլերն էլ գրանցվեցին 11 մետրանոցից: Հանդիպման մանրամասներն՝ այստեղ։
Իսկ Հայաստանի հավաքականի հետ նույն խմբում ընգրկված թիմերի՝ Էստոնիա և Վրաստանի դիմակայությունում ուժեղ էին հարևան երկրի ֆուտբոլիստները: Վրաստանի ընտրանին հաղթեց նվազագույն հաշվով:
3-րդ խմբի երկու հանդիպումներն էլ ավարտվեցին ոչ-ոքի․ Մոլդովան և Կոսովոն փոխանակվեցին մեկական գնդակով, իսկ Սլովենիան և Հունաստանը չկարողացան գտնել միմյանց դարպասների բանալիները։
4-րդ խմբի հանդիպումները ավարտվեցին միևնույն՝ 0-2 հաշվով․ Ղազախստանի հավաքականը արտագնա հաղթանակ տարավ Լիտվայի նկատմամբ, իսկ Ալբանիան ուժեղ գտնվեց Բելառուսից։
⚽ D լիգա
Վերջին լիգան ներկայացված է երկու խմբով․ 1-ին խմբում Լատվիան և Անդորրան գոլազուրկ ոչ-ոքի խաղացին, իսկ Ֆարերյան Կղզիների ընտրանին 3-2 հաշվով հաղթեց մեկ այլ կղզու ներկայացուցիչներին՝ Մալթային։ 2-րդ խմբում կայացավ միայն մեկ հանդիպում․ Ջիբրալթարը նվազագույն հաշվով հաղթեց Սան Մարինոյին՝ 1-0։
Նշենք, որ երեկ երեկոյան կայացել են արդեն երկրորդ տուրի մի քանի հանդիպումներ, որոնց, մյուս հանդիպումների հետ միասին, կանդրադառնանք արդեն մեր շարքի հաջորդ մասում։ Երկրորդ տուրը մեկնարկել է սեպտեմբերի 6-ին, իսկ վերջին հանդիպումները կկայանան սեպտեմբերի 8-ին։ Այդ օրը կկայանա նաև Հայաստանի հավաքականի երկրորդ խաղը․ մեր ընտրանին Երևանում կընդունի Էստոնիայի հավաքականին։
Վար Բաբայան