Հայաստանի ագզային հավաքականի գլխավոր մարզիչ Խոակին Կապառոսը հեռավար եղանակով պատասխանել է լրագրողների հարցերին՝ անդրադառնալով մի շարք հետաքրքիր թեմաների.
«Կուզեի շնորհավորել «Արարատ-Արմենիային» Հայաստանի չեմպիոն դառնալու առթիվ: Բացի այդ մենք Հայաստանի առաջնության մի շարք հանդիպումներ ենք դիտել, այդ մասին վիդեոնյութեր ենք պատրաստել, որոնք վստահ եմ մեզ հետագայում շատ պետք կգան»:
-Ըստ Ձեզ, կորոնավիրուսով պայմանավորված այս դադարն ու ճգնաժամն ինչպե՞ս կանդրադառնան համաշխարհային և մասնավորապես հայկական ֆուտբոլի վրա:
– Այս հարցի հետ կապված պետք է խոսել այն իրավիճակի մասին, որը կար կորոնավիրուսից առաջ և հետո: Ֆուտբոլը չի կարող լինել առանց մարզասերների, քանի որ ֆուտբոլը կիրք է ու մարզասերներն անպայման պետք է լինեն մարզադաշտում: Պետք է շատ բարձր պատասխանատվություն ունենալ. կարծում եմ՝ ՀՖՖ-ն այս առումով ճիշտ աշխատանք է տանում ու նպաստում է նրան, որ հետագայում մարզասերը վերադառնա մարզադաշտ ու հետագայում ամեն ինչ իր հունով ընթանա:
-Ունենք Խինես Մելենդեսի և իր թիմի կողմից մշակված, սակայն ոչ լիարժեքորեն հանրայնացված մանկապատանեկան ֆուտբոլի զարգացման ծրագիր, որը կարծես թե մի քանի ակումբներ արդեն կիրառում են։ Արդյոք այդ ծրագրին ծանո՞թ եք։ Ի՞նչ կտա այն Հայաստանին, որտեղ կարծես թե համապատասխան կադրերի պակասի արդյունքում այժմ ուշադրություն է դարձվում լեգեոներների նատուրալիզացիային որպես կադրային խնդիրների կարճաժամկետ լուծում։
-Պարոն Մելենդեսը, իր օգնականներ Ռուբեն Լեսկանոն և Անտոնիո Ֆլորեսն իմ ուսուցիչներն են եղել, երբ ես էի ֆուտբոլային կրթություն ստանում: Պարոն Մելենդեսը շատ մեծ փորձառություն ունի, քանի որ խոսքը ոչ միայն Իսպանիայում, այլև՝ ՈՒԵՖԱ-ում նրա աշխատանքի մասին է: Եթե խոսքը ֆուտբոլի զարգացման մասին է, այստեղ պետք է նշենք մարզչական կրթության կարևորությունը: Ու եթե այդ մարզիչները, ովքեր հետագայում պետք է աշխատեն մանուկների, պատանիների ու երիտասարդների հետ, համապատասխան կրթություն ստանան, դրանից կշահեն ֆուտբոլիստներն ու լավ ֆուտբոլիստ դառնալու շանս կունենան: Այս կրթական գործընթացի ու այն միջոցների շնորհիվ, որոնք ձեռնարկում է ֆեդերացիան, վստահ եմ՝ շատ լավ ֆուտբոլիստներ ի հայտ կգան, որոնք հայկական ֆուտբոլը կտանեն բարձունքների:
Խինես Մելենդեսը և իր թիմը ոչ միայն տեխնիկայի ու տակտիկայի առումով են կրթում մեր մարզիչներին, այլև ֆիզ.պատրաստության առումով, և ես կրկին շեշտում եմ մարզչական կրթության կարևորությունը, որ պետք է լինի Հայաստանում: Քչերը կան, որ կարող են ավելի լավ հաղորդել այդ գիտելիքներն մարզիչներին ու ֆուտբոլիստներին, քան Մելենդեսը, Լեսկանոն կամ Ֆլորեսը:
– Հայաստանի հավաքականի ո՞ր խաղացողների հետ եք հասցրել շփվել ու ի՞նչ եք քննարկել:
-Այս ընթացքում ազգային հավաքականի մոտ 19-20 ֆուտբոլիստի հետ եմ շփվել, իհարկե խոսակցության մանրամասները չեմ հաղորդի, բայց ես հաճելիորեն զարմացա, որ բոլոր տղաները մեծ նվիրվածություն դրսևորեցին ու մեծ ցանկություն հայտնեցին հետագայում ևս իրենց ելույթները հավաքականում շարունակելու:
-Ֆուտբոլային աշխարհը Ձեզ համարում է տաղանդներ բացահայտող մարզիչ: Արդյոք Երիտասարդական հավաքականում կա՞ն ֆուտբոլիստներ, որոնց առաջիկա հանդիպումներում կտեսնենք Ազգային հավաքականում:
-Այո կարող ենք տեսնել այդպիսի ֆուտբոլիստների, բայց ամբողջ հարցն այն է, որ այդ ֆուտբոլիստները պետք է խաղային պրակտիկա ունենան, դա շատ կարևոր է: Հակառակ դեպքում դժվար կլինի խաղալ Ազգային հավաքականում: Երիտասարդները պետք է խաղան, սխալներ թույլ տան, իսկ եթե խաղային պրակտիկա չեն ունենում, պարզապես անհետանում են: Վստահ եմ՝ ֆեդերացիայի կողմից կիրառվելիք նոր նորմերի շնորհիվ նրանք խաղային պրակտիկայի հնարավորություն կստանան ու ի հայտ կգան լավ ֆուտբոլիստներ: Քանի որ մեր այլ հավաքականների մարզիչները շատ լավ աշխատանք են կատարում իրենց թիմերում, այդ ֆուտբոլիստները աճելու հնարավորություն ունեն, բայց նրանց խաղային պրակտիկա է անհրաժեշտ:
-Ի՞նչ սկզբունքով են ընտրվել Հայաստանի հավաքականի մրցակիցները՝ Ալբանիայի ևՔուվեյթի ընտրանիներն, առաջիկա ընկերական խաղերի համար:
-Այդ խաղերը մեզ օգտակար կլինեն, քանի որ այդ խաղերում դաշտ դուրս կգան այն ֆուտբոլիստները, որոնք այնքան էլ հաճախ չեն խաղացել հավաքականում:Մենք կկարողանանք դիտել այդ ֆուտբոլիստների խաղն ու գաղափար կազմել նրանց մասին:
