Հայաստանի Բարձրագույն խմբի առաջնության 20-րդ տուրի շրջանակում հունիսի 3-ին և 4-ին փլեյ-օֆֆի 3 հանդիպում է կայացել:
«Արարատ-Արմենիան» Ավանի ակադեմիայի մարզադաշտում ընդունել է Վանաձորի «Լոռիին» և գոլազուրկ ոչ-ոքի՝ 0-0 հաշվով ավարտել հանդիպումը:
«Շիրակը» Գյումրիում ընդունել է «Արարատին» և 2 անպատասխան գնդակ ուղարկել մրցակցի դարպասը:
Իսկ «Նոան» «Նաիրի» մարզադաշտում ընդունել է «Ալաշկերտին» և նվազագույն հաշվով հաղթանակ տարել` խաղավարտին Վլադիմիր Ազարովի՝ տուգանայինից խփած միակ գոլի շնորհիվ:
Կայացած հանդիպումներից հետո «Արարատ-Արմենիան» շարունակում է գլխավորել մրցաշարային աղյուսակն՝ իր ակտիվում ունենալով 38 միավոր, իսկ ահա «Նոան», «Ալաշկերտը» և «Լոռին» 34-ական միավորներով կիսում են 2-րդից 4-րդ հորիզոնականները:
N | Թիմեր | Խ | Հ | Ո | Պ | ԽԳ | ԲԳ | Մ |
---|---|---|---|---|---|---|---|---|
1. | Արարատ-Արմենիա | 20 | 11 | 5 | 4 | 34 | 16 | 38 |
2. | Նոա | 20 | 10 | 4 | 6 | 28 | 21 | 34 |
3. | Ալաշկերտ | 20 | 10 | 4 | 6 | 35 | 22 | 34 |
4. | Լոռի ՖԱ | 20 | 9 | 7 | 4 | 29 | 21 | 34 |
5. | Շիրակ | 20 | 9 | 5 | 6 | 28 | 19 | 32 |
6. | Արարատ | 20 | 9 | 4 | 7 | 26 | 22 | 31 |
Հաջորդ՝ 21-րդ տուրում, «Արարատը» հունիսի 7-ին կընդունի «Նոային», «Լոռին» հունիսի 8-ին Վանաձորում կխաղա «Շիրակի» հետ, իսկ «Ալաշկերտը» նույն օրը սեփական հարկի տակ կընդունի «Արարատ-Արմենիային»: