Կորոնավիրուսի պանդեմիայի հետևանքով ֆուտբոլային աշխարհը կանգ է առել: Այս օրերին աշխարհում ընթանում է միայն 4 երկրի առաջնություն՝ Բելառուս, Տաջիկստան, Բուրունդի, Նիկարագուա: Ձմեռային շուրջ եռամյսա դադարից հետո փետրվարի վերջին վերսկսվեց Հայաստանի Բարձրագույն խմբի առաջնությունը: Կայացած 2 տուրից հետո Հայաստանի առաջնությունը նույնպես դադարեցվեց անորոշ ժամանակով:
Մինչև հայ ֆուտբոլասեր հասարակությունն ակտիվ քննարկում էր Հայաստանի առաջնությունում լեգիոներների սահմանափակման հարցը, ձմեռային տրանսֆերային պատուհանի ընթացքում հայկական թիմերն ունեցան մի շարք համալրումներ:
ArmSport.am-ն առանձնացրել է Բարձրագույն խմբում հանդես եկող 10 ամենաթանկարժեք ֆուտբոլիստներին՝ ըստ Transfermarket-ի: Հատկանշական է, որ լավագույն տասնյակում չկա ոչ մի հայ ֆուտբոլիստ:
Ներկայացնում ենք ֆուտբոլիստներին ըստ տրանսֆերային արժեքների:
1. Լուկման Հարունա – «Արարատ». տրանսֆերային ընթացիկ արժեքը՝ 550 հազար եվրո
29-ամյա ֆուտբոլիստը երևանյան թիմին է միացել 2020-ի հունվարին: Ֆուտբոլային հարուստ կարիերայի ընթացքում Լուկմանը հանդես է եկել ֆրանսիական «Մոնակոյում», որի կազմում մասնակցել է ավելի քան 50 հանդիպման։ Երկար տարիներ խաղացել է Կիևի «Դինամոյում» ու դարձել Ուկրաինայի սուպերգավաթակիր։ Պաշտպանել է ղազախական «Աստանայի» գույները՝ 2016 թվականին դառնալով Ղազախստանի չեմպիոն։
Լուկմանը Նիգերիայի ազգային հավաքականում անցկացրել է 8 հանդիպում և դարձել 1 գոլի հեղինակ՝ գրավելով Կոլումբիայի հավաքականի դարպասը:
2. Բրիան Սիլվա Գարսիա – «Ալաշկերտ». տրանսֆերային ընթացիկ արժեքը՝ 475 հազար եվրո
Բրազիլացի ձախ եզրային Բրիան Սիլվա Գարսիան դեղինների կազմը համալրեց 2020-ի փետրվարին:
27-ամյա ֆուտբոլիստը ժամանակին բրազիլական «Ամերիկա» թիմից տեղափոխվել է Լիսաբոնի «Բենֆիկա» և մեկ մրցաշրջան անցկացրել պորտուգալական գրանդ ակումբի երկրորդ թիմի կազմում:
2016-2017 թթ. Բրիանը հանդես է եկել բրազիլական Սերիա Ա-ում` պաշտպանելով լեգենդար «Կրուզեյրո» ակումբի գույները:
3. Սերգեյ Վակուլենկո – «Արարատ-Արմենիա». տրանսֆերային ընթացիկ արժեքը՝ 400 հազար եվրո
Ուկրաինացի պաշտպանը Հայաստանի չեմպիոնի կազմը համալրեց տարեսկզբին: 26-ամյա ֆուտբոլիստը խաղացել է ուկրաինական «Շախտյորի» 2-րդ թիմում, «Մարիուպոլում», «Արսենալ Կիևում» և մի շարք այլ թիմերում: Մինչ «Արարատ-Արմենիա» տեղափոխվելը եղել է ուկրաինական «Կարպատի» ակումբի ֆուտբոլիստ:
4. Վիկտոր Մուդրակ – «Ալաշկերտ». տրանսֆերային ընթացիկ արժեքը՝ 350 հազար եվրո
Մոլդովայի հավաքականի պաշտպանը «Ալաշկերտ» տեղափոխվեց 2020-ի փետրվարին:
25-ամյա ֆուտբոլիստը նախորդ երեք մրցաշրջանների ընթացքում հանդես էր գալիս մոլդովական «Պետրոկուբ» թիմում: Մոլդովայի Բարձրագույն խմբի առաջնությունում Վիկտորն անցկացրել է 171 հանդիպում` դառնալով 19 գոլի հեղինակ:
2019-ին «Ալաշկերտի» նորեկը երեք խաղ է անցկացրել Մոլդովայի ազգային հավաքականի կազմում` մասնակցելով Իսլանդիայի, Թուրքիայի և Ալբանիայի թիմերի դեմ հանդիպումներին:
5. Զակարիա Սանոգո – «Արարատ-Արմենիա». տրանսֆերային ընթացիկ արժեքը՝ 325 հազար եվրո
23-ամյա կենտրոնական հարձակվողը Վարդան Մինասյանի գլխավորած թիմ տեղափոխվեց 2019-ի ամռանը: Նախորդ մրցաշրջանում Սանոգոն 27 հանդիպում է անցկացրել Ավստրիայի Բունդեսլիգայում՝ պաշտպանելով «Հարտբերգ» ակումբի գույները, դառնալով 4 գոլի և 4 գոլային փոխանցման հեղինակ։ 22-ամյա հարձակվողը Ավստրիայում հանդես է եկել սկսած 2016/17 մրցաշրջանից՝ հասցնելով խաղալ նաև «Վոլֆսբերգեր» ակումբում։ Սանոգոն 4 հանդիպում է անցկացրել նաև Բուրկինա Ֆասոյի հավաքականի կազմում։
6. Յուսուֆ Օտուբանյո – «Արարատ-Արմենիա». տրանսֆերային ընթացիկ արժեքը 325 հազար եվրո
27-ամյա նիգերիացի հարձակվողը «Արարատ-Արմենիա» տեղափոխվեց հունվարին: Յուսուֆը հանդես է եկել սլովակական «Ժիլինա», ավստրիական «Ռայնդորֆ Ալտախ», «Ռեդ Բուլ Զալցբուրգ» և մի շարք այլ ակումբներում: «Ժիլինայի» կազմում դարձել է Սլովակիայի չեմպիոն: Մինչ «Արարատ-Արմենիա» տեղափոխվելը հանդիսացել է ավստրիական «ԼԱՍԿ» ակումբի ֆուտբոլիստ:
7. Տիգաո Կամետա – «Ալաշկերտ». տրանսֆերային ընթացիկ արժեքը՝ 325 հազար եվրո
Բրազիլացի եզրային պաշտպանը «Ալաշկերտ» է տեղափոխվել 2019-ի ամռանը: Կարիերայի ընթացքում 27-ամյա ֆուտբոլիստը հանդես է եկել բրազիլական Սերիա Ա-ի և Սերիա Բ-մի շարք ակումբներում` «Պոնտե Պրետայում», «Ֆորտալեզայում», «Սեարայում», «Ավաիում», «Բրազիլ դե Պելոտասում»:
8. Ալֆոնսե Կոջո – «Արարա-Արմենիա». տրանսֆերային ընթացիկ արժեքը՝ 300 հազար եվրո
25-ամյա կոտդիվուարցի կիսապաշտպանը «Արարատ-Արմենիայի» կազմը համալրեց 2019-ի փետրվարին:
Ալֆոնսը հանդես է եկել պորտուգալական «Շավիշ», «Միրանդելա», «Օլիվերենսի» և այլ ակումբներում:
Մինչև «Արարատ-Արմենիա» տեղափոխվելը եղել է պարտուգալական Պրեմյեր լիգայում հանդես եկող «Ֆեյրենսե» ակումբի ֆուտբոլիստ:
9. Մաիլսոն Լիմա – «Արարա-Արմենիա». տրանսֆերային ընթացիկ արժեքը՝ 300 հազար եվրո
Կաբո Վերդեի հավաքականի 24-ամյա կիսապաշտպանը «Արարատ-Արմենիային» է միացել 2019-ի տարեսկզբին: Լիման հանդես է եկել հոլանդական «Դորդրեխտ», «Ֆորտունա Սիտտարդ» և մի քանի այլ ակումբներում: Մինչ «Արարատ-Արմենիա» տեղափոխվելը հանդիսացել է ռումինական «Վիտորուլ» ակումբի ֆուտբոլիստ:
10. Թոմաս Ֆիբել – «Արարատ». տրանսֆերային ընթացիկ արժեքը՝ 300 հազար եվրո
33-ամյա Ֆիբելը կենտրոնական պաշտպան է: Երևանի «Արարատի» կազմը համալրել է այս տարվա սկզբին: Կարիերայի ընթացքում հանդես է եկել բելգիական «Ստանդարտում», «Անտվերպենում», Պերմի «Ամկարում», «Ցրվենա Զվեզդայում», «Անժիում»:
Ի դեպ, ԲԽ-ում կան 300 հազար եվրո տրանսֆերային արժողությամբ մի շարք ֆուտբոլիստներ, սակայն վերջին 3 ֆուտբոլիստների տրանսֆերային արժեքը մինչև վերջին օրերին Transfermarket-ում գնահատվում էր 350 հազար եվրո:
Այսպիսով, Բարձրագույն խմբի առաջնությունում այս պահին հանդես եկող 10 ամենաթանկ տրանսֆերային արժեքն ունեցող ֆուտբոլիստներից 5-ը հանդես են գալիս գործող չեմպիոն «Արարատ-Արմենիայում», 3-ը՝ «Ալաշկերտում», իսկ 2-ը «Արարատում»: Վերջինիս կազմում է հանդես գալիս նաև այս պահին ամենաթանկ տրանսֆերային արժեք ունեցող ֆուտբոլիստը՝ Լուկման Հարունան:
Ահա այսպիսին էր Բարձրագույն խմբի առաջնությունում հանդես եկող ամենաթանկարժեք ֆուտբոլիստների տասնյակը: Առաջիկայում կներկայացնենք նաև Առաջին խմբի առաջնությունում հանդես եկող թանկարժեք ֆոտբոլիստների տասնյակը:
Երվանդ ՀԱԿՈԲՅԱՆ
