Ֆուտբոլային սկաուտ․ Վուլվերհեմփթոն, Էվերտոն

Armsport-ը «Ֆուտբոլային Սկաուտ» շարքի շրջանակներում շարունակում է անդրադառնալ թոփ-5 լիգաների թիմերին։ Այս անգամ մեր հորիզոնում են ԱՊԼ-ի երկու ակումբների՝ «Վուլվերհեմփթոնի» և «Էվերտոնի» ամենահեռանկարային ֆուտբոլիստները, որոնց շուտով հնարավոր է տեսնենք որևէ գրանդ ակումբի մարզաշապիկով։

Ռիշարլիսոն

🇧🇷 Բրազիլիա
«Էվերտոն»
22 տարեկան

Բրազիլացի ֆուտբոլիստներին ոչ միշտ է հաջողվում իրենց լավ դրսևորել անգլիական ֆուտբոլում, սակայն մեր հերոսը դասվում է բացառությունների շարքին։ Հարձակվողական ոճի ֆուտբոլիստն արդեն երկրորդ մրցաշրջանն է անցկացնում «կապույտների» մարզաշապիկով և երկրորդ տարին անընդմեջ հատում է 10 գոլի շեմը ԱՊԼ-ում։ Վատ չէ, նույնիսկ շատ լավ արդյունք է՝ հաշվի առնելով, որ «Էվերտոնը» արդեն մի քանի տարի է պտտվում է առաջնության մրցաշարային աղյուսակի միջնամասում։ 22-ամյա ֆուտբոլիստն, ըստ մեզ, արդեն իսկ պատրաստ է ուժերը փորձել ավելի բարձրակարգ ակումբում, եթե իհարկե, լիվերպուլյան ակումբն ինքը չի փորձելու դառնալ այդպիսին։

Դիեգու Ժոտա

🇵🇹 Պորտուգալիա
«Վուլվերհեմփթոն»
23 տարեկան

Մադրիդի «Աթլետիկոն» հավանաբար արդեն զղջում է, որ բաց է թողել տաղանդավոր պորտուգալացուն՝ այդպես էլ հնարավորություն չտալով նրան ուժերը փորձել Լա լիգայում։ Ժոտան այն ֆուտբոլիստներից մեկն է, ով օգնեց «գայլերին» դուրս գալ Պրեմիեր լիգա։ Նա փայլեց Չեմպիոնշիփում, իսկ այժմ շարունակում է դա անել արդեն անգլիական ֆուտբոլի էլիտայում։ Ֆուտբոլային ինտելեկտով օժտված, տեխնիկապես հագեցած այս ֆուտբոլիստը դեռ շատ անգամներ լսել կտա իր մասին և չի բացառվում, որ շուտով մենք նրան կտեսնենք որևէ գրանդ ակումբի կազմում։

Դոմինիկ Կալվերտ-Լյուին

🏴󠁧󠁢󠁥󠁮󠁧󠁿 Անգլիա
«Էվերտոն»
22 տարեկան

Շատ մասնագետներ կանխատեսում էին, որ «Էվերտոնում» գլխավոր գոլահարի դերը կստանձնի «Յուվենտուսից» տեղափոխված իտալացի հարձակվող Քինը, սակայն․․․ 13 գոլով թիմի գլխավոր ռմբարկուն այժմ մեկ այլ երիտասարդ հարձակվող է՝ Դոմինիկ Կալվերտ-Լյուինը։ Դոմինիկը անցկացնում է իր կարիերայի լավագույն մրցաշրջանը, և արդեն նկատելի է, որ ֆուտբոլիստն արդեն իսկ պատրաստ է ուժերը փորձել ավելի բարձր մակարդակում։ Պոտենցիալ կա, ֆուտբոլիստը խաղում է բավականին հասուն ֆուտբոլ, և թերևս, լիվերպուլյան ակումբում ևս մեկ մրցաշրջանն էլ անցկացնելուց հետո նա կապացուցի, որ արժանի է կրել որևէ գրանդի մարզաշապիկը։

Ադամա Տրաորե

🇲🇱 Մալի
«Վուլվերհեմփթոն»
24 տարեկան

Եվս մեկ ֆուտբոլիստ, ով ժամանակին պետք չեկավ իսպանական գրանդին․ Ադաման կարիերան սկսել է «Օսպիտալետ» ակումբի մանկապատանեկան թիմում, որից հետո 2004 թվականին տեղափոխվել է «Բարսելոնա»։ 2013 թվականից սկսած՝ նա խաղացել է «Բարսելոնա» ակումբի երկրորդ թիմում։ Նոյեմբերի 23-ին Ադաման իր նորամուտը նշեց «Բարսելոնայի» առաջին թիմում՝ խաղալով «Գրանադայի» դեմ։ Հանդիպման 83-րդ րոպեին նա խաղադաշտ դուրս եկավ Նեյմարի փոխարեն: Եվ վերջ․․․ կատալոնական ակումբում հույսեր չկապեցին արագավազ ֆուտբոլիստի հետ, և նա տեղափոխվեց Անգլիա։ Սկզբում նա հանդես էր գալիս «Ասթոն Վիլայում», իսկ 2018-ին միացավ «գայլերի ոհմակին»։ Աթլետիկ տվյալներով աչքի ընկնող ֆուտբոլիստը ապացուցեց բոլորին, որ ոչ միայն արագություն ունի․ այժմ նա անցկացնում է բավականին հաջող մրցաշրջան՝ իր վրա սևեռելով մի շարք գրանդ ակումբների ուշադրությունը, այդ թվում նաև՝ «Բարսելոնայի»։

Մեյսոն Հոլգեյթ

🏴󠁧󠁢󠁥󠁮󠁧󠁿 Անգլիա
«Էվերտոն»
23 տարեկան

Եվս մեկ անգլիացի ֆուտբոլիստ «Էվերտոնից»։ Հոլգեյթը դեռ մի քանի տարի առաջ արդեն համարվում էր մառախլապատ Ալբիոնի ամենահեռանկարային ֆուտբոլիստներից մեկը։ Անգլիացի պաշտպանի համար սա առաջին լիարժեք մրցաշրջանն է ԱՊԼ-ում։ Նախորդ տարի «Էվերտոնը» իր պաշտպանին ուղարկել էր գործուղման Չեմպիոնշիփ՝ «Վեսթ-Բրոմվիչ», որտեղ փորձ հավաքելով՝ Մեյսոնն այժմ կարևոր դեր է խաղում լիվերպուլյան թիմի պաշտպանական գծում։ Ֆուտբոլիստը դեռ ավելացնելու տեղ ունի, միգուցե ևս մեկ մրցաշրջան «Էվերտոնում» անցկացնելուց հետո Անգլիայի հավաքականը կունենա ևս մեկ հուսալի հենասյուն ետին գծում։

Վար Բաբայան

Շարքի նախորդ մասերը

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)

Էրեդիվիզիի ամենահեռանկարային ֆուտբոլիստները (Մաս 2)

Էրեդիվիզիի ամենահեռանկարային ֆուտբոլիստները (Մաս 1)

Պորտուգալիան՝ ցատկահարթակ դեպի մեծ ֆուտբոլ

Բելգիան շարունակում է մնալ ապագա աստղերի դարբնոց (Մաս 2)

Բելգիան շարունակում է մնալ ապագա աստղերի դարբնոց (Մաս 1)

Սամուրայների նոր սերունդը Եվրոպայում

Բրազիլիայի առաջնության ամենահեռանկարային ֆուտբոլիստները (Մաս 2)

Բրազիլիայի առաջնության ամենահեռանկարային ֆուտբոլիստները (Մաս 1)