Միգուցե, Չեմպիոնների Լիգայի այս խաղային օրվա հանդիպումները չեն առանձնանում իրենց փայլով և հնչեղությամբ, բայց դրանք արժանի են ձեր ուշադրությանը:
Պայքարի մեջ են մտնում underdog համարվող թիմերը, որոնց մեջ է հայտնվել նախորդ տարվա Չեմպիոնների լիգայի եզրափակչի մասնակիցը՝ «Տոտենհեմը»: Միասին փորձենք հասկանալ, թե ինչ անակնկալներ կարող են մեզ մատուցել «ետնաբեմի այս դերասանները»:
«Ատալանտա» – «Վալենսիա».
1/8 եզրափակչի ամենագունեղ զույգը չէ. սա «Ատալանտայի» առաջին Չեմպիոնների լիգան է և Գասպերինիի տղաները ամեն ինչ անելու են հաջող հանդես գալու համար: Իտալական ակումբն իր խմբում զբաղեցնում էր վերջին հորիզոնականը, սակայն, կարողացավ շտկել իրավիճակը և դուրս գալ փլեյ-օֆֆ փուլ և այժմ կարող է ավելիին հասնել: «Վալենսիան» վերջին անգամ հաջողության էր հասել 2006-07 մրցաշրջանում, երբ կարողացավ 1/8 եզրափակչում անցնել «Ինտերի» արգելքը:
Երկու թիմերն էլ կռիվ են տալու.
«Ատալանտան» դարձավ Չեմպիոնների լիգայի պատմության մեջ երկրորդ թիմը, որը երեք անընդմեջ պարտություններից հետո դուրս եկավ խմբից: Ավելին, Ա ՍԵրիայում Գասպերինիի թիմը 45 հնարավոր միավորից՝ 18-ը վաստակել է խաղի ընթացքում պարտվելիս: Թիմը կարողանում է փոխել հանդիպման ընթացքը, բեկել անհաջող ընթացող խաղի կորագիծը: Նման ունակություններով կարող է պարծենալ նաև «Վալենսիան», որը խմբային փուլի վերջին խաղում հաղթեց «Չելսիին»(0:1) և մրցակցի հարկի տակ տարած այս հաղթանակը փլեյ-օֆֆ-ի ճանապարհ հարթեց «չղջիկների» համար:
Երկուսն էլ հաջող են հանդես գալիս թոփ ակումբների դեմ և դժվարություններ են ունենում ետնապահների դեմ պայքարում: Սա միջակ ակումբներին բնորոշ սինդրոմ է, որը բուժվում է միայն տարիների փորձով:
Միևնույն ժամանակ, պետք է նշել նրանց մեջ առկա տարբերությունները: «Ատալանտան» սիրում է խաղալ կայծակնային հակագրոհներով: Խփած գնդակների քանակով թիմը զբաղեցնում է երկրորդ տեղը թոփ 5 առաջնություններում, անցկացրած 24 խաղում՝ դառնալով 63 գոլի հեղինակ:
Իսկ ահա «Վալենսիայի» գլխավոր մարզիչ Ալբերտ Սելադեսը նախընտրում է կոմբինացիոն խաղաոճը՝ կարճ փոխանցումներ, գնդակի վերահսկողություն ու մանրակրկիտ գծագրված գրոհներ:
Երկար էստաֆետում Սելադեսի թիմը չի տպավորում (0:3 `«Այաքսից», ոչ-ոքի «Լիլի» դեմ տնային խաղում ), սակայն, իրապես կարևոր հանդիպումներում իսպանական ակումբը ցույց է տալիս իր ողջ ներուժը:
Լա Լիգայի այս մրցաշրջանում «Վալենսիան» վաստակել է 38 միավոր և զբաղեցնում է 7-րդ հորիզոնականը: «Ատալանտան» Ա ՍԵրայի այս առաջնությունում ունի 45 միավոր և գտնվում է 4-րդ գոտում: Երկու թիմերն էլ շարունակում են լավագույն քառյակում տեղ զբաղեցնելու համար պայքարը:
Աշնանը «Ատալանտային» հետապնդում էին անվերջանալի թվացող վնասվածքները: Սակայն, դրանք արդեն անցյալում են և Գասպերինիի թիմը լիովին պատրաստ է առաջիկա խաղին:
Դուվան Սապատա, Յոսիպ Իլիչիչ , Ալեխանդրո Գոմես. այս անունները պատված չեն գլամուրային փայլով, բայց այս տղաները գիտեն իրենց անելիքը: Դրա վառ օրիակը Իլիչիչն է, ով Ա Սերիայի այս մրցաշրջանում դարձել է 14 գոլի հեղինակ:
Ի տարբերություն իտալական ակումբի, «Վալենսիան» չկարողացավ խուսափել վնասվածքներից: Գաբրիել Պաուլիստայի որակազրկումը և Էզեկիել Գարայի լուրջ վնասվածքը ծանր հարված են հասցնում «չղջիկների» պաշտպանությանը: Դժվար է ասել, թե արդյո՞ք Մանգալան և Դիակաբին կկարողանան դիմակայել «Ատալանտայի» արագաշարժ հարձակվողերին:
Միգուցե, Վալենսիան ներկայացնող թիմին օգնի այն հանգամանքը, որ հանդիպումը կայանալու է Միլանում (Բերգամոյի մարզադաշտը չի համապատասխանում ՈւԵՖԱ-ի չափանիշներին):
Մի բան հստակ է՝ մենք ականատես ենք լինելու 1/8 եզրափակչի ամենակոլորիտային հակամարտություններից մեկին:
«Տոտենհեմ»-«ՌԲ Լայպցիգ».
Հատկանշական է, որ նախկինում թիմերը եվրագավաթներում չեն հանդիպել միմյանց: Պետք է նշել, որ մրցակիցները լավ տրամադրությամբ են մոտենում այս հանդիպմանը, քանի որ երկուսն էլ հաղթանակներ տոնեցին ներքին առաջնություններում: «Տոտենհեմը» գերազանցեց «Աստոն Վիլային» (3:2), իսկ Նագելսմանի թիմը տանը ջախջախեց Բրեմենի «Վերդերին»`3:0:
Հասկանալի է, որ երկու ակումբներն էլ հաղթելու մեծ ցանկություն ունեն: Մասնավորապես, «Տոտենհեմը» դեմ չի լինի կրկնել նախորդ տարվա Չեմպիոնների լիգայի արդյունքը (լոնդոնցիները հասան եզրափակիչ), իսկ «ՌԲ Լայպցիգը» ցանկանում է պատմություն կերտել՝ առաջին անգամ դուրս գալով 1/4 եզրափակիչ:
Կարելի է ենթադրել, որ «Տոտենհեմը» խաղի առաջին րոպեներից կնետվի առաջ` փորձելով դառնալ արագ գոլի հեղինակ: Իհարկե, «ՌԲ Լայպցիգն» էլ չի պատրաստվում միայն պաշտպանվել, քանի որ «ցուլերը» նույնպես փորձել և զգացել են մրցակիցների «արյան համը»: Սպասվում է, որ խաղը առատ է լինելու վտանգավոր պահերով: Եվ սա մենք ասում ենք մի խաղում, որտեղ թիմերից մեկի մարզիչը Ժոզե Մոուրինյուն է: Այո, «ՌԲ Լայպցիգը» կստիպի պորտուգալացուն մի պահ հրաժարվել իր պաշտպանողական ֆուտբոլից:
«Տոտենհեմը» վերջին 7 հանդիպումներից 5-ում հաղթել է, իսկ երկուսը ավարտել է ոչ-ոքի. և սա առանց Քեյնի:
«Կեղծ 9» համարի դերը խաղում է Լուկաս Մոուրան : Սակայն, Մոուրինյուի իրական գլխացավանքը` Սոն Հին-Մինի վնասվածքն է: Սոնը խաղ ստեղծող, կառուցող ֆուտբոլիստ է, ում կարիքը լոնդոնյան ակումբը շատ կզգա:
Հարձակման գծի խնդիրները պորտուգալացին կարող է չեզոքացնել խաղադաշտի կենտրոնը վերահսկելու օգնությամբ: Այս գոտում կարևոր դեր կարող է խաղալ փորձառու Յան Վերտոնգենը:
Գերմանական «ցուլերը» անհաջող սկսեցին տարին և զիջեցին Բունդեսլիգայի առաջին հորիզոնականը: Վերջին 5 հանդիպումներից 2-ում նրանք չեն կարողանում գոլի հեղինակ դառնալ:
Այս ամենին գումարվում է նաև Դայո Ուպամեկանոյի կորուստը, ով Յուլիան Նագելսմանի տակտիկական դասավորությունում առանցքային դեր ունի: Թիմին չեն կարողանա օգնել նաև Կևին Կամպլը, Իբրաիմա Կոնատեն և Վիլի Օրբան:
Երկու թիմերն էլ խոցելի կետեր ունեն պաշտպանությունում: Եթե հյուրերը կադրային խնդիրներ ունեն, ապա տանտերը խաղակցվածության պակաս են զգում:
Հաշվի առնելով այն հանգամանքը, որ երկու թիմերն էլ խաղադաշտը չեն լքում առանց գոլերի, կարող ենք գոլառատ հանդիպման հույս ունենեալ: Իսկ թե ով կհաղթի այս մենամարտում, կպարզենք այսօր` կեսգիշերից հետո:
Նարեկ Գրիգորյան
