Այսօր կարևոր օր է հայկական ֆուտբոլում. ընտրվելու է ՀՖՖ նախագահը և նոր Գործկոմը:
ArmSport.am-ը զրուցել է ԲԿՄԱ-ի տնօրեն Գագիկ Աղբալյանի հետ, ով «Աչաջուր» ՀԿ-ի կողմից առաջադրվել է Գործկոմի թեկնածու:
Աղբալյանը խոսել է սպասվող ընտրությունների, կատարած ու կատարվելիք աշխատանքների, ինչպես նաև ԲԿՄԱ-ի գործունեության մասին
-«Աչաջուր» ֆուտբոլային ակումբ ՀԿ-ի կողմից առաջադրվել եք ՀՖՖ Գործկոմի թեկնածու։ Ինչպե՞ս ստացվեց առաջարկը և ինչպե՞ս եք գնահատում Ձեր շանսերը:
-«Աչաջուրը» գրանցված է եւ գործունեություն է ծավալում իմ ծննդավայր Աչաջուր գյուղում։ Ակումբի ղեկավար կազմի հետ շատ վաղուց տարբեր ծրագրեր ենք իրականացրել, իրար լավ ենք ճանաչում։ Միգուցե ԲԿՄԱ-ում գործունեությունն ամենավճռորոշ դերն է կատարել իմ թեկնածությունն առաջադրելու հարցում։ Բնականաբար քննարկումներ են եղել ակումբի հիմնադիր անդամների ժողովի կողմից։ Սա Ժողովի որոշումն է։
Իմ շանսերից խոսել չեմ կարող։ Դա ՀԿ-ների որոշելիքն է։ Ամեն ինչ պարզ կլինի քվեարկության արդյունքում։
-Որպես Գործկոմի անդամ՝ ի՞նչ ծրագրերում եք մտադիր գործունեություն ծավալել:
-Առաջին հերթին՝ մանկապատանեկան դպրոցներում պետք է ներդնել համալիր կրթություն։ Սա հիմքերի հիմքն է։ Եվ ՀՖՖ-ն այս ճանապարհով է գնում։ Երկար տարիներ շեշտը դրվել է դրվագային հաղթանակների վրա։ Վերջին շրջանում համակարգային բնույթի աշխատանքներ են կատարվում, որոնց արդյունքը կարճ ժամանակում տեսանելի չի լինելու։ Մի քիչ պետք է սպասենք։
Մարզիչների խղճին է ամենակարեւոր գործը՝ ապագա ֆուտբոլային աստղերի կրթությունը։ Հազարավոր մարդիկ մարզիչներին կամ մանկավարժներին են հանձնում ամենաթանկը՝ իրենց երեխաների հոգիները։ Հենց այստեղ է ձեւավորվում կամ մեռնում մարդը։ Գոնե ապագայում չպետք է մարզչական լիցենզիա ունենան մարդիկ, որոնք ուղղակի հասկանում են ֆուտբոլ խաղը՝ բառի պարզունակ իմաստով։ Պետք է ներգրավել բազմակողմանի, ունիվերսալ մարդկանց, ովքեր նաեւ հրաշալի կտիրապետեն ֆուտբոլային կրթության գիտելիքներին։ Ես համապատասխան առաջարկներով ու ծրագրերով եմ հանդես գալու։
Եթե դու լավ ֆուտբոլիստ ես եղել եւ մեծ ֆուտբոլը թողնելուց հետո լուրջ չես վերաբերվել մարզչական կրթությանը՝ որպես համալիր բարդ ու մեծ աշխատանքի, ապա չես կարող հաղթողներ պատրաստել։ Միայն խստությամբ, ֆուտբոլային հեղինակությամբ չես կարող երիտասարդ ֆուտբոլիստներին դարձնել բարձր կարգի պրոֆեսիոնալներ։ Գիտելիք է պետք, նորագույն կրթություն։
Երբ ակումբները ՀՖՖ-ին քննադատում են մրցավարության համար, ես ուզում եմ ասել՝ սպասեք, սա է մեր ունեցած մարդկային ռեսուրսը։ Իսկ արդյո՞ք ֆուտբոլային ակումբներն իրենք կարողացել են լուծել կարգապահական կամ այլ տիպի խնդիրներ, արդյո՞ք պաշտոնական խաղերի կազմակերպչական հարցերում իրենք բացթողումներ չեն ունենում։ Ամեն տեղ խնդիրներ ունենք, եւ այդ խնդիրները բերում ենք ֆուտբոլում։
Ինձ համար լավ մրցավարը նա է, ով ինտելեկտուալ է, ունի բարձր կարգապահություն, վերլուծելու ունակություն, անգամ ինտուիտիվ մակարդակում կարող է ճիշտ որոշում կայացնել։ Այս ամենն ունենալու համար պետք է ավելի հետեւողական սելեկցիա անել, հրավիրել խելացի երիտասարդների։ Գործկոմը, իմ պատկերացմամբ, պետք է նախաձեռնող լինի եւ առաջարկի այս ամենին նպաստող ծրագրեր։ Պետք է աջակցել մրցավարական կորպուսին՝ լավ կադրեր հայտնաբերելու եւ կրթելու գործում։
Միգուցե զարմանալի հնչի, բայց, այո, ֆուտբոլում բարեփոխումների համար նաեւ կողքի աչք է պետք։ Մեծ ֆուտբոլով անցած մարդկանց աշխատանքը պետք է լրացնեն նաեւ ուրիշները՝ ովքեր մեծ փորձ ունեն կրթության, հանրային կառավարման, գիտության ու շատ այլ ոլորտներում։ Այդ կողքի աչքը կարող է նկատել, թե ինչն է պակասում ֆուտբոլին։ Ես հանդես եմ գալու ծրագրերով, որոնք հայկական ֆուտբոլը պետք է դարձնեն ավելի ինտելեկտուալ։
-Որպես ԲԿՄԱ-ի տնօրեն, ինչպե՞ս կամփոփեք անցած ամիսները:
-Դեռ հուլիս ամսին, երբ թիմը նոր էր ձեւավորվում, քչերն էին հավատում, որ կհասցնենք մասնակցել 2019-2020թթ․ առաջնությանը։ Ամենահոռետեսները մեզ հույս էին տալիս, որ նախապատրաստական փուլն առնվազն վեց ամիս կտևի, եւ մենք կխաղանք հաջորդ մրցաշրջանից։ Մյուսները կանխատեսում էին, որ առաջին երեք տուրերին չենք հասցնի մասնակցել, մեզ տեխնիկական պարտություն կգրանցվի։ Մի քանի հոգի, այդ թվում՝ Ռաֆայել Նազարյանը, Արմեն Մելիքբեկյանը, Արմեն Նիկողոսյանը, ես, գիտեինք ինչ է պահանջվում մեզնից յուրաքանչյուրից, որպեսզի ԲԿՄԱ-ն հենց առաջին տուրից պատրաստ լինի։ Այս օրերի մասին արժե հուշեր գրել։
Տղաները զորամասում նախնական զինվորական պատրաստվածություն էին անցնում, շարային քայլք, զենքի կիրառություն, միեւնույն ժամանակ, ամեն օր ավտոբուսով մեկնում էինք Էջմիածնի մեր բազա՝ մարզվելու։ Իսկ առաջնությունն արդեն 4-5 օրից պետք է մեկնարկեր։ Առաջին 3 խաղից երկուսում հաղթեցինք։
Թիմը խաղային, կարգապահական, աշխարհայացքի փոփոխության առումներով մեծ աճ է գրանցել։ Ֆուտբոլային աշխարհում դրական իմիջ ունենք։ Մենք հրաժարվել ենք այն մոլորությունից, որն ուղղակի խանգարում է հայկական ֆուտբոլի զարգացմանը, թե՝ ֆուտբոլիստներն անկարգապահ մարդիկ են։ Դա հորինվածք է։ Թե մարզումներից, թե ներգնա ու արտագնա խաղերից հետո՝ “բանակայինները” հանդերձարանը հանձնում են մաքուր վիճակում։ “Ուրարտու-2”-ի հետ խաղից հետո մարզադաշտի աշխատակցուհին դժգոհեց, որ ԲԿՄԱ-ն հանդերձարանը ժամանակին չի ազատում։ Ասաց․ “Մենք էլ տուն տեղ ունենք։ Դուրս եկեք, որ մաքրենք, գնանք տուն”։ Հանդերձարանում աղբն արդեն կոկիկ հավաքած էր, իրեն անելու բան չէր մնացել։
Մեզ համար մրցակցությունը մնում է խաղադաշտում, մրցավարի վերջին սուլիչից հետո չկա մրցակցություն։ Թե խաղադաշտում, թե դրանից դուրս հարգանքով ենք վերաբերվում մրցավարին, ֆուտբոլային պաշտոնյաներին, մրցակից թիմերին, անգամ կարող եմ “գործընկեր” բառն օգտագործել։
ԲԿՄԱ-ում խրախուսվում է փոխադարձ նվիրումն ու հոգատարությունը։ Անտարբերությունը, վիրավորանքը, ծաղրը, խտրականությունը մեզ մոտ գոյություն ունենալ չեն կարող։ Բայց սա բավարար չէ մեծ հաղթանակների համար։
Այժմ մարզչական շտաբի հետ քննարկում ենք ԲԿՄԱ-ի զարգացման տարբեր մոդելներ։ ԲԿՄԱ-ն, կտեսնեք, դառնալու է առողջ համակարգ՝ իր երկարաժամկետ ծրագրերով։ Հիմա խոսում են, թե ներկայիս մեր աստղերը հերթափոխ չունեն։ Հերթափոխ փնտրեք ԲԿՄԱ-ում։ Ռաֆայել Նազարյանն այստեղ պատրաստում է կադրեր հավաքականի համար։
-Ակումբի առկայությունը պետական ի՞նչ խնդիրներ է լուծում և որքա՞ն ինտենսիվ է համագործակցությունը Պաշտպանության նախարարության հետ:
-ԲԿՄԱ-ի ստեղծումը հայկական ֆուտբոլի զարգացման համար արդարացված քայլ է։ ԲԿՄԱ-ում հայկական ֆուտբոլի ապագան է կերտվում։ Այստեղ ֆուտբոլիստներ են պատրաստվում հավաքականների համար։
Այս տղաները պետք է զորամասային ծառայություն անցնեին, ինչից կտուժեր ֆուտբոլը։ ՊՆ-ն հանուն ֆուտբոլի զարգացման ընդառաջել է ՀՖՖ ղեկավարության այս նախաձեռնությանը, որպեսզի տասնյակ առաջատար ֆուտբոլիստներ սահմանի փոխարեն լինեն խաղադաշտում։ Մեր ֆուտբոլիստները գիտակցում են դա։ ԲԿՄԱ-ում հետեւյալ փիլիսոփայությունն է՝ առաջինը՝ պետությունը, հայրենիքը, հետո մեր անձն ու ամբիցիաները։
Բանակի հետ մեր շփումը շատ ինտենսիվ է։ Տղաները Ռազմական համալսարանի զինծառայողներ են, եւ, օրինակ, դեկտեմբեր ամսին ես արդեն 5-6 անգամ տարբեր հարցերով հանդիպել եմ համալսարանի պետին, նույնքան անգամ հարցեր ենք լուծել հեռահար կարգով։ Շատ արդյունավետ համագործակցում ենք։
-Նկատել ենք, որ ակտիվորեն ծրագրեր եք իրականացնում: Խոսեք կատարված աշխատանքներից և առաջիկա անելիքներից:
-Այս ընթացքում շփումներ ենք ունեցել բանակի, սահմանամերձ գյուղերի բնակիչների հետ, մասնակցում ենք տարբեր հանրային միջոցառումների, ակցիաների, թատրոններ ենք այցելում եւ այլն։
Սուրբ Ծննդյան տոներից հետո կառաջնորդվենք ակումբի զարգացման պլանով, որը ես այս օրերին մշակում եմ, եւ որը ենթադրում է ոչ միայն ֆուտբոլային կրթություն, այլև հանրային եւ սոցիալական ներառական քայլեր եւ այլն։ Սա ավելի հասուն է դարձնում ֆուտբոլը։ Հունվարին ակումբի ողջ կազմը կստորագրի նաեւ էթիկական կանոնակարգ, որպեսզի հարաբերությունների մեր կանոններն ամրագրված լինեն որեւէ փաստաթղթով։
Այս ընթացքում սկսել ենք քննարկել մի կոնցեպտ՝ Վաղարշապատի ֆուտբոլի ակադեմիայում իրականացնելու համար։ Խոսքը ակադեմիայի տարբեր տարիքային երեխաներին ոչ միայն ֆուտբոլային կրթություն տալու մասին է՝ քննարկումների, դասախոսությունների, դիտումների, այցելությունների եւ այլնի միջոցով։ Նպատակը մեր երեխաներին ավելի ինտելեկտուալ դարձնելն է, հետեւաբար՝ ֆուտբոլ միտք բերելը։ Երեխաներն իրենք զգում են դրա կարիքը։ Օրերս ակադեմիայի 14-15 տարեկան սաների հետ ավելի քան մեկ ժամ “նկարել ենք” մեր երազանքի ակադեմիան, որտեղ տեղ ունեն գիրքը, գրադարանը, լավ ֆիլմերը, թանգարաններ այցելությունը, արշավներ կազմակերպելը։ Երեխաները նույնիսկ ցանկանում են ունենալ հոգեբան, ով պրոֆեսիոնալ մակարդակով կխթանի իրենց աճին, կտրամադրի խաղերին։ Այնինչ Բարձրագույն խմբի թիմերում հոգեբաններ չկան։ Սրանք փոփոխություններ են, որ աստիճանաբար պետք է տարածել հայկական ֆուտբոլի ամբողջ քարտեզի վրա։
Արման Առաքելյան