Ֆուտբոլի Չեմպիոնների լիգայի ընթացիկ խաղարկությունը տարբերվում է նախորդ խաղարկություններից։ Թիմերի գրաֆիկը չափազանց խիտ է։ Առաջին երեք տուրերն անցկացվեցին 3 շաբաթ անընդմեջ։ Այնուհետև եկավ հավաքականների դադարն ու հիմա դարձյալ թիմերը խաղում են մեկ շաբաթի տարբերությամբ։ Ահա այսպես հասանք 5-րդ տուրին, որը շատ բաներ կարող է վճռել։
Խաղային առաջին օրվա թիմերից երկուսն արդեն ապահովել են իրենց տեղը փլեյ-օֆֆ փուլում։ Այդ թիմերն են «Բավարիան» և «Մանչեսթեր Սիթին»։ Մյունխենցիները շարունակում են հաստատուն կերպով պահել մրցաշարի գործող չեմպիոնի ու գլխավոր ֆավորիտի կարգավիճակը։
Այսօր «Բավարիան» Մադրիդում խաղալու է «Աթլետիկոյի» դեմ։ Որքան էլ պարադոքսալ է, բայց Լա լիգայում գերազանց ելույթներ ունեցող «Աթլետիկոն», լուրջ խնդիրներ ունի ՉԼ-ում։ Ու եթե Սիմեոնեի թիմը ցանկանում է խաղալ ակումբային ֆուտբոլի ամենահեղինակավոր մրցաշարի գարնանային հատվածում, ապա ամեն ինչ պետք է դնի «Վանդա Մետրոպոլիտանոյում» «Բավարիայի» դեմ խաղին։ «Լոկոմոտիվը» 2 միավորով է հետ «ռոխիբլանկոսներից» ու այսօր խաղում է «Զալցբուրգի» հետ։ «Բավարիային» չհաղթելու դեպքում խմբում կարող է ամեն ինչ գլխիվայր շուռ գալ։ Այդ դեպքում 2-րդ տեղի հարցը A խմբում կորոշվի վերջին տուրում։
«Մանչեսթեր Սիթին» էլ է խաղալու իր խմբում 2-րդ տեղը զբաղեցնող թիմի դեմ։ Բայց եթե «Բավարիայի» պարագայում անգամ վերջին 2 տուրերում պարտությունը այլևս չի կարող խլել առաջին տեղը, ապա Պեպ Գվարդիոլայի սաների մոտ այլ վիճակ է։ 12 միավոր ունեցող «Ման Սիթին» խաղալու է «Պորտուի» դեմ, որն ունի 9 միավոր։ Առաջին տեղում հաստատվելու համար «քաղաքայիններին» հաղթանակ է պետք արտագնա խաղում։
Խմբի մյուս խաղում «Մարսելը» հյուրընկալելու է «Օլիմպիակոսին»։ Եթե հունական ակումբը չհաղթի այս խաղում, ապա ավտոմատ կերպով փլեյ-օֆֆի 2-րդ ուղեգիրը կնվաճի «Պորտուն», անկախ այն արդյունքից, որը կգրանցվի խմբի առաջատարների խաղում։ «Մարսելը» դեռևս միավոր չի վաստակել ընթացիկ խաղարկությունում։
Մրցաշարի ամենատիտղոսակիր թիմը գնացել է այն քաղաք, որտեղ նվաճել է Չեմպիոնների լիգայի վերջին գավաթը։ «Ռեալը» Կիևում հյուրընկալվելու է «Շախտյորին»։ Զինեդին Զիդանի թիմը տարօրինակ ու ոչ կայուն ֆուտբոլ է ցուցադրում։ Մեկ նրանք անթերի ֆուտբոլ են խաղում «Ինտերի» դեմ ու արժանիորեն հաղթում, մեկ անփառունակ խաղով պարտվում են «Ալավեսին»։
«Ռեալը» 7 միավոր ունի ու հաղթանակի դեպքում կապահովի տեղը փլեյ-օֆֆ փուլում։ «Արքայական» ակումբը նման պահերին կարողանում է հավաքվել ու հասնել ցանկալի արդյունքի։ Մանավանդ, Զիդանի թիմը պետք է փորձի ռևանշի հասնել մեկնարկային տուրում «Շախտյորից» կրած պարտությունից։
Խմբի մյուս խաղում առաջատար «Բորուսիա» Մյունխենգլադբախը տանն ընդունելու է «Ինտերին»։ Անտոնիո Կոնտեի թիմի համար սա վերջին շանսն է։ Եթե «ներաձուրիները» չհաղթեն այս խաղում, ապա կմոռանան փլեյ-օֆֆի մասին նաև այս տարի։
Բայց անգամ հաղթանակի դեպքում ամեն ինչ «Ինտերի» ձեռքում չէ։ Փլեյ-օֆֆ դուրս գալու համար «Ինտերին» հարկավոր է հաղթել մնացած 2 խաղերում ու սպասել, որ «Ռեալն» էլ վերջին տուրում կհաղթի «Բորուսիային»։ Միայն այդ դեպքում «Ինտերը» կարող է շարժվել առաջ։ «Բորուսիան» հաղթանակի դեպքում նվաճում է փլեյ-օֆֆի ուղեգիր։ Կա սցենար, որով գերմանական թիմը անգամ ոչ ոքիով կարող է հաջորդ փուլ դուրս գալ։ Դա այն դեպքում եթե «Ռեալը» չպարտվի «Շախտյորին»։
Խաղային օրվա թոփ դիմակայություններից մեկն էլ կկայանա «Էնֆիլդում»։ «Լիվերպուլը» ընդունելու է «Այաքսին»։ Այս խմբում ամեն ինչ առավել քան խառն է։ Յուրգեն Կլոպի թիմն ունի 9 միավոր։ 7-ական միավոր ունեն «Այաքսն» ու «Ատալանտան»։ Իտալացիները խաղալու են «Միթյուլանդի» դեմ։ Կասկածից վեր է, որ «Էնֆիլդում» իսկական մենամարտ է լինելու։
Այո՛, «Լիվերպուլը» հաղթանակի դեպքում կնվաճի փլեյ-օֆֆի ուղեգիր, բայց «Այաքսը» կռվելու է։ 0 միավոր ունեցող «Միթյուլանդը» դժվար թե կարողանա ինչ-որ բանով խանգարել «Ատալանտային»։ Ամեն դեպքում թվում է, որ այս խմբում ամեն ինչ կորոշվի վերջին տուրում, երբ հանդիպեն «Այաքսն» ու «Ատալանտան»։
Արամ Սահակյան
