Հայաստանում սքվոշի զարգացման հեռանկարներ կան (լուսանկարներ)

Հայաստանում սքվոշ մարզաձևի ֆեդերացիան գործում է 2011 թ-ից: Այն անդամակացում է սքվոշի Եվրոպական ֆեդերացիային: Եթե գաղափար չունեք, թե ինչ սպորտաձևի մասին է խոսքը, ապա կարող եք որոշակի գաղափար ստանալ՝ մտնելով այստեղ:

Սքվոշի Հայաստանի ֆեդերացիայի նախագահը «Գրանդ Հոլդինգի» նախագահ Միքայել Վարդանյանն է, որը սքվոշի մեծ սիրահար է: Ինչպես փաստում է մարզաձևի ակտիվիստներից Հերմինե Հարությունյանը, ֆինանսավորումն ամբողջությամբ իրականացնում է Միքայել Վարդանյանը, պետական աջակցություն չկա: Սպորտաձևն աշխարհում մեծ տարածում ունի, իսկ Հայաստանում կա մասսայականացնելու նպատակ:

Հայաստանը շատ հաճախ ընդունում է միջազգային մրցաշարեր, և Հայաստանից նույնպես մարզիկներ մեկնում են միջազգային ստուգատեսերի:

Սպորտաձևով զբաղվելը թանկ հաճույք չէ: Ձեռնաթիակը կարելի է ձեռք բերել 100-150 դոլարի սահմաններում, որը խնամքով պահելու դեպքում հնարավոր կլինի օգտագործել մի քանի տարի:

Սքվոշի Հայաստանի ֆեդերացիան այս օրերին կազմակերպել է 3-օրյա մաստեր-կլաս Ռուսաստանից ու Պակիստանից ժամանած մարզիչների շնորհիվ:

Պակիստանից ժամանած մարզիչ Սաջիդ Խանը Armsport.am-ի հետ զրույցում առանձնացրեց մի քանի մանրամասներ, որոնք վերաբերում էին ոչ միայն մարզաձևին:

-Պարոն Խան, ո՞ր երկիրն է սքվոշի հայրենիքը:

-Սքվոշով սկսել են զբաղվել Անգլիայում: Հենց Բրիտանիան դարձավ մարզաձևի հայրենիքը, սակայն հետագայում այստեղ զարգացում չապրեց այն ուժով, որով հիմք էր դրվել;

-Իսկ աշխարհում, ո՞ր երկրի մարզիկներն են դոմինանտ:

-Թե՛ կանանց, թե՛ տղամարդկանց շրջանում այս պահին ուժեղագույները եգիպտացիներն են:

-Ի՞նչ մասսայականություն ունի սպորտաձևն ամբողջ աշխարհում:

-Երբ ստեղծվեց սպորտաձևը, 19 երկրում էին զբաղվում դրանով. հիմնադիր Անգլիան և ևս 18 երկիր: Իսկ հիմա շատերն են նախընտրում սքվոշը: Այն առողջության համար շատ օգտակար է: Սքվոշը կոփում է քեզ և՛ ֆիզիկապես, և՛ հոգեպես:

-Ի՞նչ հեռանկարներ կան:

-Աշխարհում մեծ հեռանկարներ կան, օր օրի ավելի է մասսայականանում այն: Ավելի շատ են դառնում սպորտաձևով զբաղվողները, իսկ Հայաստանում այն մի փոքր ավելի դանդաղ է զարգանում:

-Ըստ Ձեզ, սքվոշը կդառնա՞ Օլիմպիական մարզաձև:

-Շատ հետաքրքիր ու բարդ հարց եք տալիս (ժպտ. է): Ցանկությունը մեծ է և կան խոսակցություններ, որ 2024թ-ին այն կլինի Օլիմպիական պլանում, բայց իմ սուբյեկտիվ կարծիքով՝ 2028թ-ին կամ 2032թ-ին այն նոր կտեսնենք Օլիմպիական Խաղերում:

-Ինչպե՞ս կգնահատեք սքվոշի զարգացումը Հայաստանում:

-5-6 տարի է ինչ այս համալիրն օժանդակում է սքվոշի զարգացմանը: Միքայել Վարդանյանը ներդրումներ է անում: Նա միակն է ամբողջ երկրում, որ նպաստում է սքվոշի զարգացմանը: Նա ամեն տարի այսպիսի միջոցառումներ է կազմակերպում Գրանդ Սպորտում և ներդնում է մոտ 5000 դոլար: Նրա շնորհիվ մարզաձևի զարգացումը Հայաստանում առաջ է գնում:

-Ե՞րբ է առաջին անգամ միջազգային մրցաշար կազմակերպվել Հայաստանում:

-Միքայել Վարդանյանի ջանքերով 4 տարի առաջ Հայաստանում միջազգային մրցաշար կայացավ: Շատ լավ է, որ Վարդանյանն ինքը սքվոշի մեծ սիրահար է: Դա մեծապես օգնում է մարզաձևի մասսայականացմանը:

Արմեն Գարամյան